Inahan sa katawhan

Saulogon sa simbahang Katoliko sa Sugbo ang ika-100 nga kasumaran sa pagpakita sa Mahal nga Birhen didto sa Fatima, Portugal.

Ang selebrasyon ipaagi sa Grand Marian Procession ug sa paghalad og santos nga misa karong gabii.

Sugdan ang candlelight penitential walk sa Capitol area alas 9:00 karong gabii padulong sa Basilica del Sto. Niño. Gilaumang modagsa ang liboan ka deboto sa inahan sa Dios sa naasoy’ng kalihokan.

Nunot niini, gilauman usab nga maapektohan ang dagan sa mga sakyanan nga moagi sa karsada nga agian sa procession.

Alang sa mga tawo nga dili gustong ma-traffic, mas maayo nga magpundo na lang una mo, o nga mouban sa procession sanglit dako kining kasaulogan nga gipahinungod sa inahan sa atong manunubos nga si Hesukristo.  

Alang kanato nga mga Katoliko, ang inahan sa Dios ato usab nga inahan, kansang kaaghop ug kalooy iyang gihatag kanato pinaagi sa iyang tim-os nga pag- ampo.

Isip mga anak, magpalaban kita sa babaye nga gisampit nato nga Mama Mary, ang Inahan sa Kanunay’ng Panabang.

Pinaagi sa iyang pagpangama sa iyang anak nga si Hesus, ang atong mga pangaliyupo, matuman gyud.

Karong buwan sa Oktobre, mao usab kini ang buwan sa pagrosaryo, apan daghan ang adunay rosaryohan apan igo lang gibitay sa mga sakyanan. Ang rosaryo, 10 minutos ra, apan dukaon na ug dili pa mahuman, samtang pag-facebook pwede ra nga dili mamilok hangtud ma-low bat ang cellphone.

Ako gani naigo man sab niining akong komentaryo. Bitaw saulogon nato ang ika- 100 ka tuig sa Birhen sa Fatima pinaagi sa kinasingkasing nga pagsalmot karong gabii sa Marian Grand Procession, ug kadtong dili kaapil, mogahin unta og panahon sa pag-ampo.