Banat ( Leaderboard Top ), pagematch: 1, sectionmatch: 1

Dugang LTO satellite office

Nagpa-renew ko sa akong driver’s license sa Land Transportation Office (LTO) sa SM City kaniadtong miaging Martes ug akong namatikdan nga puwerteng daghana nga mga tawo nga susama kanako og tuyo didto.

Natingala ko kay dili man g’yud unta ingon niadto kadaghan ang mga tawo nga mopa-renew sa ilang driver’s license didto. Nahibaw-an nako nga ang uban diay kanila, taga Mandaue City nga wala na makatultol kon asa mobalhin ang LTO-Mandaue.

Kaniadto gud, ang LTO-Mandaue didto man magbase sa Barangay Looc, Mandaue apan wala na sila masayod nga gibalhin na kini sa JCenter Mall sa Barangay Bakilid aron konbinyente kaayo ang mga molukat og lisensya ug magpa-renew sa rehestro sa ilang sakyanan.

Unya, kagahapon sa buntag, nakadungog ko sa programa sa akong higala nga radio announcer nga mibasa sa text messages nga nagreklamo kay daghan usab diay kaayong milukat og lisensya ug nagpa-renew sa rehestro sa ilang sakyanan sa LTO-Natalio Bacalso Avenue.

Bitaw, gamay g’yud kaayo ang luna sa LTO-Natalio Bacalso Avenue, unya init pa g’yud kaayo. Pagka karon, mas bentaha g’yud didto sa LTO-JCenter Mall sa Mandaue kay mingaw pa didto ug paspas kaayo ang transaksyon.

Sagdi lang, kay gisultihan ko sa higala nako sa LTO nga buksan na usab nila sa dili madugay ang LTO-Robinsons diha dapit sa Fuente Osmeña. Nindot kaayo kining gihimo ni LTO-7 regional director Alita Pulga nga nag-open sila og mga LTO satellite office sa mga mall kay bugnaw alang sa mga manglukat og lisensya ug rehestro.

* * *

Lisud g’yud bitaw katuohan ang pangangkon ni Ermita tanod Junnel Sanchez nga nangilog og armas kaniya ang ilang dinakpan nga si Lendon Abadinas. Giangkon sa tanod nga gibinaklid pagposas si Abadinas diha nga giingon niya nga nangilog sa iyang armas.

Kataw-anan g’yud kaayo. Aw, bisan og si Junnel Sanchez akong posasan nga ibinaklid, sa ato pa ang bukton anaa sa likud, kon makahimo pa siya sa pagpangilog og armas. Mao na ang giingon “Tell that to the dead marines!”

Akong balikon nga angay g’yud nga pahupton og armas ang usa ka tanod, apan kinahanglan nga ayuhon sa pagpili. Ang sama og batasan ni Sanchez dili g’yud angay nga pahupton og pusil.

Tan-awa karon, dako kaayo kini nga problema kay mag-atubang man siya og kaso. Sa akong pagbana-bana, sigurado g’yud nga murder ang mapasaka niini batok kaniya, ug ang murder wala’y piyansa.

  • Follow Us: