Gamhanan nga CA
Wala tugoti sa Commission on Appointments ang paglingkod ni Health Secretary Paulyn Jean Ubial. Si Secretary Ubial mao na ang ikalima nga sakop sa gabinete ni Presidente Rodrigo Duterte nga giitsapuwera sa CA.
Nauna ni Secretary Ubial mao sila si Foreign Affairs Secretary Perfecto Yasay, Environment Secretary Gina Lopez, Agrarian Reform Secretary Rafael Mariano ug Social Welfare Secretary Judy Taguiwalo.
Giitsapuwera sa CA ang pagkatudlo ni Secretary Ubial human nga ang mga sakop niini mitoo sa pasangil sa mga nagsupak sa iyang pagkatudlo sa posisyon.
Ang kanhi presidente ug chief executive sa Philippine Health Insurance Corporation (PhilHealth) nga si Hildegardes Dineros miingon nga si Ubial namakak pinaagi sa pag-ingon nga miluwat siya sa katungdanan bisan nga ang tinuod siya gitangtang.
Gisugyot usab ni Ubial ang pagpang-apud-apod og condom sa mga tinun-an sa pampublikong tunghaan sa nasud, apan iya ra usab kini nga gibakwi human makasugat og pagsaway sa katawhan.
Ang pag-itsapuwera sa CA sa lima ka sakop sa gabinete ni Duterte nagpakita lang sa pagkagamhanan sa nahisgutang commission. Ang Commission on Appointments kabahin kini sa gitawag nga Check and Balance sa presidential nga sistema ug demokrasya nga kagamhanan.
Ang commission gituyo pagbutang sa atong batakang balaod aron sa ingon ang presidente dili magpatuyang sa pagtudlo og sakop sa iyang gabinete. Gusto nga likayan niini ang pagtudlo sa presidente og mga tawo nga dili kuwalipikado sa posisyon mao nga ang commission gihatagan og gahum paghashas ug pagkonpirma sa mga gipangtudlo sa presidente nga naghupot og cabinet position.
Ang CA adunay chairman ug 24 ka sakop. Magsilbing ex-officio chairman sa commission ang presidente sa Senado ug ang maglangkob sa 24 ka sakop mao ang 12 ka senador ug 12 ka sakop sa Kongreso.
- Latest