Banat ( Leaderboard Top ), pagematch: 1, sectionmatch: 1

EDITORYAL - Warrantless arrest

Ang balaod naghatag og gahum ni bisan kinsa nga sibilyan nga makadakop og tawo, bisan og wala’y warrant of arrest, kon masakpan ang maong tawo nga paingon na nga mohimo og krimen; atol sa paghimo sa krimen; ug human nga kini nakahimo’g krimen. Gitawag kini og “citizens arrest” nga gilatid sa Section 5, Rule 113 sa Revised Rules of Criminal Procedures.

Gilatid sa balaod nga ang usa ka sibilyan mopahibalo g’yud sa tawo nga iyang buot dakpon sa iyang tinguha nga sikupon kini tungod sa iyang binuhatan nga wala na masubay sa lagda. Gitugot hinoon nga dili na kinahanglang pahibaw-on pa ang tawo nga dakponon nga siya dakpon, kon ang paghimo niini, moresulta nga siya makaikyas.

Sagad nga mohimo og citizens arrest mao ang mga tanod sa kabarangayan, apan daghan sa mga tanod ang kuwang og kahibalo kon unsaon sa pagpatuman ang ilang katungod sa pagdakop nga wala na kinahanglana pa ang warrant of arrest. Kini maoy hinungdan nga makalapas sila sa katungod sa usa ka tawo.

Sama sa gihimo sa mga tanod sa Barangay Ermita, dakbayan sa Sugbo nga ang uban nila nga mga dinakpan tanggongon nila sa ilang gamay’ng selda sa barangay hall ug dugay kaayo nila nga itugyan ngadto sa kapolisan aron nga kapasakaan og kaso ang dinakpan base sa iyang nahimong salaod.

Kinahanglan g’yud nga ang usa ka tawo nga gidakop base sa citizens arrest ikiha dayon sa hukmanan aron nga ang mga government prosecutor nga gitawag kaniadto og piskal, mosuta kon angay ba nga prisuhon ang mao nga dinakpan.

Wala usab tuguti ang mga tanod nga dagmalan nila ang ilang mga dinakpan aron pugson kini pagpatug-an. Kinahanglan nga magtuon ang mga tanod kon unsaon pag-imbestigar aron makakuha sila og inpormasyon sa tawo nga ilang gisikop.

  • Follow Us: