Police clearance valid ID na

Ang valid identification card mahinungdanon kaayo alang sa mga transaksyon, apan daghan sa atong kaigsuonan ang naproblema niini.

Ang uban nahanaw ang ID kay naapil sa pagkasunog samtang dunay mga tawo nga wala g’yuy ID kay wala nakasuway sa pagpanarbaho ug uban pa nga mga rason.

Gani gikinahanglan pa sila nga mopalit og postal ID nga medyo dako ang bayad, o ba kaha maghulat kanus-a ma-release ang voter’s ID nga abtan og siyam-siyam, usa pa makuha.

Apan may kapaingnan na karon kining mga tawhana sa gipatuman nga modernong sistema police clearance.

Gawas sa hard copy nga gamiton alang sa requirement sa trabaho, o bisan unsa nga transaksyon, aduna na usa’y plastic card o police clearance ID card, pareho kini og porma sa driver’s license o SSS card nga magamit na isip valid government ID.

Ang proseso susama sa NBI clearance, apan mas paspas ug hi-tech karon ang police clearance diin makuha lang sulod sa singko minutos ang plastic card.

Pareho sa NBI nga adunay ma-hit, apan mahimo ra mahulat og pipila ka minutos kon itandi sa NBI nga usa ngadto sa duha ka semana ang huwaton ayha pa makuha ang clearance ug wala’y ID Card ang NBI clearance.

Magamit ang police clearance card nationwide sulod sa usa ka tuig ang validity sa kantidad nga P200 itandi kaniadto nga P100 lang sulod sa unom ka bulan nga papel lang.

Pribadong kompaniya ang nagpadagan niining bag-ong sistema nga gipatuman sa dakbayan sa Lapu-Lapu, Mandaue, ug Tagbilaran. Dili lang ko segurado kon ingon na ba usab niini ang sistema sa dakbayan sa Sugbo.

Maayo unta kon ingon niini na usab ang himoon sa ubang ahensiya sa kagamhanan, sama sa National Bureau of Investigation.