EDITORYAL - Daghang tanod may armas

Wala’y molalis nga risgo kaayo ang trabaho sa usa ka barangay tanod. Sila maoy giisip nga “agents to persons in authority” diha sa tagsa-tagsa nila ka barangay. Sa laktud nga pagkasulti, sila ang mga “polis” nga mopatuman sa kahusay ug kalinaw sa usa ka dapit.

Ang Local Government Code nga maoy balaod nga sumbanan sa mga tagdumala sa probinsya, siyudad, lungsod ug kabarangayan, wala g’yud moingon nga tugotan paghupot og armas ang mga tanod. Apan mahimo nga makahupot og armas ang usa ka tanod kon giisyuhan siya sa Camp Crame og License To Own and Possess Firearms (LTOPF) ug Permit to Carry Firearms Outside Residence (PTCFOR).

Tungod sa risgo kaayo nga trabaho sa tanod nga maoy una nga moresponde sa mga alarma diha sa ilang barangay nga sagad binuhatan sa mga armadong tawo, salikwaot nga sila wala’y mga armas nga magamit sa pagpanalipod sa ilang kaugalingon.

Angay g’yud unta nga ilatid sa balaod nga ang usa ka tanod tugotan nga makahupot og armas nga pinalit sa barangay, o sa kagamhanan sa dakbayan o lungsod nga ang barangay nasakop. Apan kinahanglan nga ibutang g’yud sa balaod nga dili basta-basta nga bisan kinsa na lang usab ang kuhaon nga tanod.

Wala na makurat ang katawhan kagahapon diha nga milanog ang balita nga usa ka tanod sa Barangay Ermita, dakbayan sa Sugbo, nakapusil ug nakapatay’g tawo nga giingon nila nga kusog kaayo mangawat sa ilang dapit. Daghan ang nasayod nga ang mga tanod hilom nga nagluklok og mga armas.

Si tanod Jonnel Sanchez naghupot og 45 kalibre nga pistola nga wala’y lisensya. Kon tuohan nimo ang iyang pangangkon nga buot ilogon sa ilang dinakpan ang iyang armas, nagpaila lang kini nga kuwang g’yud siya og abilidad kay giposasan man ang duha ka bukton sa ilang gidakop.