Drugas, kinaiyahan ug politika

Gitigbas gamit ang duha ka sundang ug gigulgol pa ang liog sa asawa hangtod nga kini naputol. Mao kini ang gidangatan sa 25-anyos nga si Lovely Jane Quinio, inahan sa duha ka anak nga nag-edad pa lang og upat ka tuig ug duha ka tuig. Ang naghimo sa krimen mao ang iyang 27-anyos ug giingong adik nga kapuyo nga si Dominic Pahugot. Ang krimen nahitabo didto sa Sitio Libo, Tayud, Consolacion, lalawigan sa Sugbo.

Ang krimen nasaksihan sa duha ka anak sa magtiayon. Ang mga silingan sa magtiayon misugilon nga gidagan-dagan ni Dominic ang putol nga ulo sa iyang kapuyo ug pagkahuman gitabonan og dahon sa saging sa basketbolan.

Napatay ra usab sa mga miresponde nga kapolisan, kauban sa mga barangay tanod si Dominic.

* * *

Patay usab ang usa ka panday nga si Joel Brobo niadtong Sabado sa hapon human kini mataboni sa midahili nga yuta ug dakong bato sa luyo nga bahin sa GMA7 Compound.

Si Joel nagpaabot nga tahanan sa iyang daog sa swertres sa alas kuwatro nga bola, usa siya mopauli sa ilang lungsod sa lalawigan sa Sugbo, apan samtang siya naglakaw sa dapit human sa pagtuang sa kusog nga uwan, kalit lang nga midahili ang yuta ug nadat-ogan siya sa yuta ug bato.

Gidali pagluwas si Joel sa mga tawo nga nakakita sa iyang gidangatan, ug sa mga emergency responders ug gidala sa tambalanan apan nakabsan gayud kini sa kinabuhi.

* * *

Naglaraw si Cebu City Councilor James Cuenco nga moluwat na lang sa iyang katungdanan kon dili dayon matagad sa Court of Appeals ang iyang gipangayo nga Temporary Restraining Order ug Injunction sa kamandoan sa Ombudsman nga nagtangtang kaniya sa katungdanan tungod sa kasong Dishonesty ug misconduct sa dihang nagsilbi pa siya nga Chief of Staff sa iyang amahan nga si kanhi kongresista Tony Cuenco.