Gustong paliton ang yuta nga gipuy-an pinaagi sa data-data
Dear Atty. Divine,
Duna koy giabangan nga yuta nga maoy among gitukuran sa among pinuy-anan. Ang tag-iya niini, mitanyag kanamo kon interesado ba daw mi mopalit kay ila kining ibaligya kanamo. Interesado ko nga mopalit atty apan pinaagi sa data-data, unsay kasabutan o kontrata ang angayan namo nga pirmahan uban sa tag-iya? Portion lang ang akong paliton atty so dapat ba nga ipa-survey namo daan ang property or ini’g human na sa pirmahanay namo ipa-survey? Daghang salamat.— Lando
Dear Lando,
Kon paliton nimo pinaagi sa installment ang portion sa property nga maoy imong gitukuran sa inyong balay, ang dokumento nga angayan ninyong pirmahan uban sa tag-iya mao ang Deed of Conditional Sale nga diin nalatid niini kon pila ang imong down payment, pila ang imong monthly nga bayranan ug kon pila ka buwan kini nimong i-fully paid. Dapat adto kamo magpirmahanay sa abogado ug dayon panotaryuhan ninyo ang maong dokumento. Kon padung na nimo ma-fully paid ang property, dungan sa paghatag nimo sa last payment, magpirmahanay na sad kamo og Deed of Absolute Sale ug human niini imong i-process ang pag-transfer ngadto sa imong pangalan sa portion nga imong napalit. Mas maayo sab nga ipa-survey ninyo daan before mo magpirmahanay aron maklaro gyud kon pila ka square meters ug ma-identify daan ang portion nga imong paliton. Thanks and God bless. — Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@ yahoo.com og akong tubagon ang inyong pangutana pinaagi sa akong column matag Miyerkules, Sabado og Domingo.
- Latest