Kinsa ang nagsulti sa tinuod

Misukol mao nga ilang napatay. Mao ni ang pamahayag sa mga polis sa dakbayan sa Mandaue nga nakapatay sa tulo ka managsuon nga sila si Ruben, Jhon Vincent ug Jerome Umpad atol sa ilang giingon nga buy-bust operation.

Apan lahi ang sulti sa inahan nga si manang Jean Umpad. Iyang gipanghimakak ang pasangil sa mga polis nga nalambigit sa gidili nga drugas ug nagbaton og armas ang iyang tulo ka anak.

Ang inahan miasoy nga daw sama sa baboy nga gipatay sa mga polis sa Mandaue ang iyang mga anak. Iyang gisaysay nga duha ka polis ang misulod sa ilang barung-barong nga nahimutang sa evacuation area sa Cebu International Convention Center. Gipukaw siya ug gipagawas uban sa iyang kapuyo, iyang anak nga si Rustom ug kapuyo niini, samtang sila si Ruben, Jhon Vincent ug Jerome nangatulog.

Wala madugay nakadungog dayon siya og unom ka boto sa armas ug iyang nakita ang tulo niya ka anak nga patay na. Iya usab nga nakita nga naghapa na nga nakabinaklid sa iyang kamot nga nakaposas ang iyang anak nga si Rustom.

Dili makadawat ang inahan nga si Jean sa nahitabo sa tulo niya ka anak nga duha ra ka adlaw niyang nakauban human kini makagawas sa prisohan.

Ang tulo ka managsuon bag-ohay pa lang nga nakagawas sa prisohan tungod sa kasong murder human sila nakapahimulos sa Justice on Wheels nga programa sa Korte Suprema. Ang tulo ka managsuon nga gipatay napriso sulod sa walo ka tuig sa Mandaue City Jail.

Giunsa kaha sa pagpamaligya og drugas ug pagsukol sa tulo ka managsuon ngadto sa mga polis kon sila nangatulog? Ang Commission on Human Rights nag-imbestigar na. Kon kamo ang pangutan-on, kinsa man kaha nila sa polis ug manang Jean ang nagsulti sa tinuod? Kinsa man ang inyong tuohan?