Nahadlok ba si Presidente Duterte?

Mibahad si Presidente Duterte nga mag-umol og komitiba nga moimbestigar sa kahiwian sa buhatan sa Ombudsman. Kini human nga gibulgar sa Ombudsman ang mga dokumento nga gisumiter sa Anti-Money Laundering Council kabahin sa giingong mga kwestiyonable nga katigayonan sa presidente nga mikabat og subra sa P1 billion.

Apan miingon ang Ombudsman nga wala sila mahulga sa bahad ni Duterte ug mibarug sa ilang gihuptan nga mga dokumento batok sa presidente. Ang buhatan sa Ombudsman miawhag sa presidente nga dili mahadlok kon wala man kini gitagoan nga kwestiyonableng transaksiyon sa bangko.

Ang mga dokumento nga gihuptan sa Ombudsman nga gihatag sa Anti-Money Laundering Council susama diay sa mga dokumento nga gibandilyo na kaniadto ni Senador Antonio Trillanes IV hinungdan nga miabot sa dunggan ang ngisi sa senador human niya masayri ang gibulgar sa Ombudsman.

Nahadlok ba si Duterte sa mga dokumento nga gihuptan sa Ombudsman? Husto ang Ombudsman. Dili angay’ng mahadlok ang presidente kon wa kini kwestiyonable nga transaksiyon sa bangko.

Sa laing bahin, ang giplano sa presidente magtukod og komisyon aron mag- imbestigar sa giingong kahiwian sa buhatan sa Ombudsman, hulga sa pagka independente sa nahisgotang buhatan, ug kalapasan sa batakang balaod.

Kon ang presidente tugotan sa pag-umol og komisyon nga mag-imbestigar sa kahiwian sa buhatan sa Ombudsman, sayon na unya kaayo niini ang paglikay sa iyang mga anomaliya ug sa pagparalisar sa trabaho sa Ombudsman.

Mao kini ang rason ngano nga ang Ombudsman matangtang lang pinaagi sa Impeachment, base lang sa dayag nga paglapas sa batakang balaod (culpable violation of the Constitution), pagtraydor (treason), pagsuborno (bribery), pagpangurakot (Graft and Corruption), ug ubang tag-as nga krimen (other high crime) ug pagbudhi sa pagsalig ug kompiyansa sa katawhan (betrayal of public trust).