Media ID, dili VIP Card!

Miani og ubay-ubay nga reaksiyon ang akong gi-post sa facebook mahitungod sa pag-abuso sa prebilihiyo isip tigbalita ngadto sa mga tawo nga ikatagbo panahon sa news coverage.

Dili man tanan apan adunay pipila, o usa ba kaha ka media practitioner ang nakalimot nga ang atong Media ID dili “all access pass” nga pwede makasulod bisan sa mga restricted area, ug labaw sa tanan dili VIP card nga magpatagad dayon ug mamugos g’yud ug ihungit ang tubag sa interviewhon.

Tingali, mahimong palabyon lang ang pagkakulit sa reporter kun gipaagi sa diplomasya ang paghangyo kay basin diay makalusot ug mosugot ang news source.

Apan garapal na kaayo kun ‘late’ na sa coverage ug wala pa g’yud makaapil sa briefing unya mao pa ang masuko ug manginsulto sa opisyal kay gipahinumdoman sa mga ‘do’s and don’ts.

Tungod lagi kay media kuno, dut-an dayon og equipment ang baba sa news source kinsa magkapuliki intawon sa pagpanagang kay wala pa lagi mahuman ang kalihokan.

Tungod kay gibalibaran, magyawyaw na dayon ug mo-walkout tungod sa kadako sa ulo, este garbo, kay media lagi. Pastilan, angayan natong hinumdoman nga dili kita ang boss sa atong mga news sources.

Pareho sa usa ka bisita, nasaag sa ilang balwarte ug gitarong sa pag-abi-abi, apan mao pa hinoon ang maglabilabi.

Sabton nato sila sanglit dunay protocol sila nga gisunod sa ilang trabaho.

“RESPETO” sa kaugalingon ang atong batonan kay kun anaa kita niini, makahibalo usab kita morespeto sa uban.

Dili ba kita maulaw nga adunay moingon sa atong luyo “Pagkabastos niadtong tawhana.”