Katungod sa illegitimate nga anak sa asawa

Dear Atty. Divine,

Ang akong igsuon nangasawa og babaye nga daan na nga may anak. Naa sila magpuyo tipon sa among inahan kay patay na man ang among papa. Ang bata nga anak sa laing lalaki sa iyang asawa, nagpangedaron na og 2-anyos ug karon akong nahibaw-an nga gibalhin na ang apelyido sa bata sa apelyido sa akong igsuon ug siya na ang nagsilbe nga amahan niini. Ang akong mama ug papa adunay mga property. Ang akong pangutana kon makasunod na ba sa kabtangan sa among mga ginikanan kining bata nga giangkong anak sa akong igsuon?  — Bernie

Dear Bernie,

Kon ang bata gisagop sa imong igsuon pinaagi sa korte ug adunay Decree of Adoption, then ang bata makonsiderar nga legitimate nga anak sa imong igsuon. Isip legitimate nga anak aduna na siya’y katungod nga mo-inherit sa kabtangan sa imong igsuon. Apan sa kabtangan sa imong mama og papa dili direkta nga maka-inherit ang bata samtang buhi pa ang imong igsuon.

Apan kon mamatay ang imong igsuon ang bata mahimo nga mo-inherit sa gibilin nga kabtangan sa imong mga ginikanan by representation, sa ato pa, ang bata ang mo-inherit sa share nga alang sa imong igsuon kon pananglit unang mamatay ang imong igsuon,  apan kana mahitabo lang kon ang bata legally adopted. Apan kon pananglit gi-simulate lang ang birth certificate sa bata pinaagi sa pagbutang sa pangalan sa imong igsuon bisan kon dili siya ang amahan sa bata, then pwede kini ninyo nga kuwestiyonon sa korte ug hayan dili g’yud maka-inherit ang bata sa kabilin sa imong igsuon kay dili man kini niya kadugo. - Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.