Legislative Police?

Naa g’yuy nawong nga bisan unsaon sa pagsapsap, dili g’yud madutlan tungod tingali sa hilabihan kabaga na sa kubal nga ang hait nga suwab sa sundang, mountol lang.

Pastilan ingon niini ang nawong sa uban nga mga anaa sa puwesto sa gahum nga dayag kaayo sa ilang kaarogante ug kaabusado.

Wala pa gani mahuwasi ang katawhan sa kakugang sa pagmando ni House Majority Floor Leader Rodolfo Fariñas sa mga opisyal sa DOTR atol sa usa ka public hearing nga palabyon na lang ang mga kongresista ug dili sitahon sa higayon nga makalapas kini sa lagda sa trapiko. Wala matagbaw, eskortan pa g’yud kuno paingon sa kongreso aron dili malangan sa trabaho.

Karong bag-o lang, tinguha na usab ni Fariñas nga mag-umol og Philippine Legislative Police (PLP) nga maoy mohatag og seguridad sa mga kongresista, lakip na sa pamilya hangtod na sa ikaduhang degree sa kadugo niini.

Ha? Asa man kuhaon ang kuwarta sa pagsweldo niining mga sakop sa PLP, kon madayon man ang lakang ni Fariñas? Siyempre gikan sa singot sa katawhan. Wala intawon siya pangilogi sa iyang gibati nga ipapas-an sa katawhan ang iyang kapritso. Susama ra nga mag-umol sila og private army nga ang mga Filipino maoy moabaga sa gasto.

Dayag kaayo kini sa pagpakita kon unsa ka garapal ang pag-abuso sa ilang gahum kon mahinayon man kini. Wala g’yud siya maikog ni Presidente Duterte nga kanunay mipahimangno sa mga opisyal sa gobiyerno nga magpuyo sa simple nga kinabuhi. Gani kon ang presidente ang pagbut-on, dili man siya gustong adunay mga PSG nga magsunod-sunod kaniya.

Mosakay ra usab siya og commercial flight. Sukwahi man kaayo ang gipakita sa iyang kaalyado sa kongreso nga usa ka pag-abuso sa gahum nga ipaagi sa legal pinaagi sa pagpanday ug balaod.  Pwede nato kini nga tawgon og “legal abuse of power” ang lakang ni Fariñas. Labaw sa tanan, dakong insulto sa PNP ang lakang ni Fariñas kay nagpakita man nga wala sila’y salig sa kapolisan.