Mga posisyon sa tudlo nga pangkalma (2)

* SHUNYA MUDRA — Ablihan ang kamot ug ituyhad ang mga tudlo. Unya ipiko ang ikatulo nga tudlo ug ikonek sa kumagko nga may gaan nga presyur. Pagpahupay kini sa kasakit. Pagpakalma kini sa tibuok lawas ug makatabang sa panakit o mga problema sa dalunggan, ug sa pagkalipong nga napuno sa kalibog ang hunahuna (vertigo) ug pamanhod nga kapoy pamation ang mga parte sa lawas.

* GYAN MUDRA — Ablihan ang kamot nga ituyhad ang mga tudlo ug unya ipiko ang ikaduha nga tudlo (panudlo) ug itakdo sa kumagko. Nagpukos kini sa kahibalo o kinaadman nga pataason ang imong interes ug kaikag (enthusiasm), sa kahinam sa pagkat-on nga madugangan ang pagbaton og kahibalo nga naghatag ni og positibo nga epekto sa pagpalig-on sa memorya.

* VARUN MUDRA — Ablihan ang kamot nga ituyhad ang mga tudlo. Unya, ipiko ang ikalima nga tudlo (kumingking) ug ikonek sa kumagko. Makatabang kini  nga pakalmahon ang artraytis, sa nagsalimuang nga hormones ug sa pag-atiman sa lawas nga kulang sa tubig.

* AAKASH MUDRA —Ablihan ang kamot nga nakatuyhad ang mga tudlo, unya ipiko ang ikaupat nga tudlo (singsingan) ug itakdo sa kumagko. Kini, maoy pagpagaan sa kaugalingon. Makaayo kini labi na kon buot nato irelaks ang kaugalingon, gikan sa mga bug-at nga kaakohan, nga halos dili na makapuhaway.

Sulaye lang kining mga gihulagway natong mga posisyon sa tudlo, kay dili bitaw kita maalkanse ug wala sa’y mawala kanato.

Pagpukos lang sa pamalandong sa tanang higayon, ipraktis nga iposisyon ang mga tudlo sa pagpakalma sa gipamati nato.