PUJ modernization

This is a welcome development. Kabahin sa Public Utility Modernization Program sa gobiyerno, mao kining pag-modernize sa mga PUJ. 

Subay niini, karong October 12 ug 13 adunay 14 ka design sa mga PUJ nga i-display didto sa Philippine Trade Center sa Manila. Main feature niini mao nga ang entrance ug exit sa kilid na, dili na sa likud, nga prone kaayo sa aksidente.  Ang design giisip nga environment-friendly ug convenient public vehicles. Adunay 24 ka ahensiya sa gobiyerno, NGOs, ug academe ang magtambayayong alang sa kalampusan ning maong proyekto.

Ug matud pa, “The government will subsidize each jeep with P80,000 covering the equity of 5 percent,” ug kini ipaagi sa DBP ug sa Land Bank. Nindot ni. Apan kanus-a kaha ni mahitabo?

* * *

So, klaro na. wala na’y barangay elections, aron kuno dili modaog ang drug-supported nga mga barangay officials. Resulta niini, atong gi-extend ang serbisyo sa daghang wala’y hinungdan ug drug personalities nga mga opisyal sa barangay. 

Ang election ra man ang gi-postpone, awtomatic ba usab nga extended ang pangatungdanan sa mga opisyal sa barangay? Kon magtudlo og mga OICs, unsa man ang basehan kon kinsa ang palagputon ug kinsa ang i-retain?

Aduna kita’y 340,000 ka barangay officials, 42,028 niini mga kapitan sa barangay. Dili sayon ang pagpanudlo ning maong gidaghanon nga mga opisyal.

Tingali og mapareho ni sa mga Owek (OICs) panahon ni Cory diin bisa’g kinsa na lang ang kalit nahimong gobernador, mayor, mga sakop sa legislative bodies, ug ubang elective officials sa local government.

Unsaon man usab pagseguro nga ang ipanudlo unya, dili connected sa gidiling druga?

* * *

Sa atong pagsuwat niini, wala pa kita masayod kon mosugot ba ang lalawigan sa Sugbo sa hangyo ni Mayor Tomas Osmeña nga ang siyudad maoy mo-operate sa karaang parking area sa Kapitolyo diha sa IT park.

Makahatag kini’g barato nga pag-parking fee ilabi na sa mga nagtrabaho sa call center sulod sa IT park. Nindot, apan kon moingon ang lalawigan nga sila na lang ang mo-develop ug mo-operate sa gilaraw nga parking area, wa na ta’y mahimo niini.

* * *

In exchange kuno aron dili na makasohan ang mga Marcos, ila kuno nga i-donate ang bahin sa ilang katigayonan nganhi sa atong gobiyerno. Mga pangutana: Ngano nga partial ra man ang i-donate o iuli? Unsa man ni, kinawat o hinagoan? Pila may worth karon sa giingong Marcos Foundation? Ug, how do we claim all of Marcos’ possessions with no strings attached?