EDITORYAL - Kinsa’y sad-an

Gidepensahan ni Foreign Affairs Secretary Alan Peter Cayetano ang administrasyong Duterte sa iyang 25 minutos nga speech didto sa hawanan sa United Nations headquarters atol sa 72nd United Nations general assembly.      

 Matud ni Cayetano, ang war on drugs ni Presidente Duterte gikinahanglan kaayo aron mapanalipdan ang tawhanong katungod sa mga Pilipino.

Husto si Cayetano nga gikinahanglan ang “stern measures” pinasubay sa balaod aron batokan ang maong problema. Apan ang pangutana kon pinasubay ba sa balaod ang gipanghimo sa kagamhanan karon? Nagpakabuta-bungol si Cayetano sa kamatuoran nga adunay mga operasyon kontra ilegal nga drugas nga kuwetiyonable kaayo.

Daghan na ang nabalita bahin sa paninguha ni Duterte nga matabangan ang mga gusto nga mag-usab, apan dili ikalimod nga mas daghan ang mga balita sa mga nitiyabaw tungod sa human rights violations. Sala diay ni sa media?  

Iyang pasangil nga gitutokan lang sa media ang mga kalapasan sa mga otoridad ug wala kini nibalita bahin sa mga nahitabong linoog nga krimen nga binuhatan sa mga durugista. Duna ba’y pamantalaan, radyo o telebisyon nga dili mobalita bahin sa nagkadako nga problema sa kriminalidad tungod sa kalambigitan sa ilegal nga drugas?

Kanus-a man gud nahitabo nga wala mabalita ang mga heinous crimes kay gipalapi ang mga balita nga makadaot sa administrasyon?

Kon nagtarong pa ang mga ahente sa gobiyerno, aduna ba’y mosaway kanila ug kang Duterte? Dili ba kaha kay wa siya’y lawom ug objective nga tubag sa isyu mao nga iya na lang pasanginlan ang media nga naghimo og “alternative facts” ug fake news? Fake diay ang kapin 10 mil na ka gidudahang durugista nga nangamatay nga sila mismo maoy naglista? Kon ang media maoy pakasad-on, maayo tingali nga mopakita si Cayetano og ebidensya nga tungod sa balita nahimong adik kining mga tawhana.

Dili ba kaha sala mismo sa gobiyerno, ilabi na sa nangagi nga administrasyon, kon nganong nigamot og maayo kining problema sa ilegal nga drugas?