Baha ug sardinas

Si Mayor Tomas Osmeña ang tipo sa usa ka lider nga mopabansiwag sa iyang mga hunahuna, plano, ug mga programa diha sa Facebook. Unsa may tuyo niini? Siyempre, si Osmeña usa sa mga nahibiling klase sa mga traditional politicians nga mogamit og taktika sa propaganda aron ipaabot ang messaging sa katawhan.

Ang tuyo niini mao ang paghulma og hunahuna sa mga tawo subay sa iyang kagustohan. Estilo usab kini sa Liberal Party nga dag-on lang sa propaganda ug PR tweaks ang mga aksiyon. Gisulat ko kini tungod kay naglagot ko nga nagtan-aw sa post ni Osmeña kalabot sa baha sa tibuok siyudad sa Sugbo niadtong Huwebes sa hapon paingon na sa gabii.

Matud niya sa iyang post nga wa’y puas ang iyang paghunahuna kalabot sa baha sa siyudad ug sa estado sa drainage system sa dakbayan sa Sugbo. Tiaw mo na, gisanapan na sa tubig-baha ang siyudad sa Sugbo ug ang mga motorista nangatanggong sa karsadang gipangbahaan, mga pasahero nanga-stranded, mga negosyo nangadaot, ug mga estudyante ug trabahante nagabhian pagpauli, si Osmeña nagsige pa og hunahuna unsa’y sulbad sa baha.

Timan-i nga si Osmeña nahimong mayor sa siyudad sa Sugbo niadto pa’ng 1987. Makapila na magbalikbalik pagka-mayor, apan wala g’yud makahimo og drainage masterplan sa tibuok siyudad sa Sugbo. Maayo pa ang Mandaue kay sa panahon ni anhing Mayor Teddy Ouano nakahimo sila og drainage masterplan, pero wala na ko mahibalo kon gipatuman ba sa nagsunod nga mga mayor.

Sukad niadtong 1987, nagsige lang og hunahuna si Osmeña unsa’y sulbad sa baha? Mga 30 na ka tuig ang milabay, unya pila pa man ka tuig ang atong paabuton aron makahulma og maayong programa si Osmeña aron masulbad ang baha? Usa ka programa nga gipanghambog ni Osmeña nga makasulbad sa baha mao ang “basura mo sardinas ko.” Nagtuo si Osmeña ug ang iyang mga kauban sa BOPK nga kon manghatag og sardinas, ma-engganyo ang mga tawo pag-intrigar sa basurang tinigom ngadto sa garbage truck. Dugay na kining gisugdan pero matud pa anaa ra sa barangay Lahug ug Cogon-Pardo. Mao ba diay bahaan pag-ayo kining mga barangaya?

Mao nga kon atong imbentaryuhon ang gidaghanon sa sardinas nga nahatag sa siyudad, puwerteng daghana. Unya midungan usab kadaghan ang mga post sa mga hulagway sa mga basura nga naglaundok sa bisan asang lugar sa siyudad.

Nagtuo ko nga kining “basura mo, sardinas ko” kon dili negosyo, pamolitika ra g’yud. Pobre tuod ang mga siyudad, pero wala’y katungod si Osmeña nga mo-barat nila. Ang sardinas simbolo sa ka-pobre. Kon manghatag ang mayor niini, nakamenos kini sa mga tawo. Baha ang angay sulbaron dili ang kagutom nga sulbaron lang nila og sardinas.