Tinuod nga hawod sa Sugbo
Si Alita Pulga, officer-in-charge sa Land Transportation Office (LTO) sa Central Visayas, ang usa sa nakapahimus sa kalibog ni Presidente Rodrigo Duterte kinsa ang paminawon sa nagkasungi niyang mga sinaligan sa Sugbo.
Kasaligan namong tinubdan nagbutyag nga dili si Pulga, apan managlahi ang mga ngalan nga girekomendar ngadto ni Duterte nga mobanos sa liderato sa LTO-7 gikan nilang Cabinet Secretary Leoncio Evasco Jr., Kalihim Adelino Sitoy, presidential adviser on legislative affairs ug pangulo sa Presidential Legislative Liaison Office; ug kang Presidential Assistant for the Visayas Michael Lloyd Dino.
* * *
Laing tinubdan nibutyag nga dako ang tingog ni Evasco kon kinsa ang matudlo sa labing mahinungdanon nga mga katungdanan dinhi sa Sugbo ug sa rehiyon. Gawas lang kon may sukwahi nga mga rekomendasyon si Dino, ug kon sama sa kaso sa LTO may lain sab nga itugpo si Sitoy.
Sa nag-ung-ong nga paghulip sa nabakanteng katungdanan ni kanhi Cebu City Councilor Hanz Abella, kon si Dino lang ang paminawon sa presidente, seguro na nga matudlo ang iyang bayaw nga si Renato Osmeña Jr., apan mahimong mosukwahi sa iyang kabubut-on si Evasco.
* * *
Samang tinubdan nipasabot nga ang pagtudlo ni Abella sa National Labor Relations Commission wa moagi ni Evasco. Nga gikatahong nakugang ug nahimangod kay nakapapas man sa mayoriya sa Cebu City Council sa iyang suod nga si Cebu City Mayor Tommy Osmeña.
Isip konsuylo sa paglaktaw niya, si Evasco, nga maoy gitahasan ni Duterte nga magsilbi nga iyang taytayan sa mga hangyo ni Mayor Osmeña, ang gikataho nga gitugyanan sa Malakanyang pagbuot kinsa’y irekomendar ngadto sa presidente nga ipuli ni Abella.
* * *
Napilian ni Evasco nga ipuli ni Abella ang iyang sinaligan sa Sugbo sa kampanya ni Duterte sa niaging piniliay, dili sakop sa Team Rama ni sa Bando Osmeña Pundok Kauswagan. Kinahanglan nga maningkamot ang duha ka pundok pag-usab sa iyang hunahuna.
Ang pangulo sa United Nationalist Alliance, kanhi Bise Presidente Jejomar Binay, niduso na ni Renato Osmeña Jr., apan dili makadaot sa politikanhong interes ni Binay ang pagduso sa laing ngalan nga irekomendar ni Evasco aron tinuod nga may kapilian ang presidente.
Busa sa dili pa magsaulog si Renato Jr., angay una siya nga mo-amen sa kanhi pari nga si Evasco.
* * *
- Latest
