EDITORYAL - Daghang skywalks

Dili malalis nga ang pagmugna og flyover diha sa mga eskina sa mga dagkong karsada sa dakbayan, makatabang g’yud pagsulbad sa problema sa kahuot sa mga sakyanan. Apan kinahanglan nga dili kay usa, duha o tulo lang ka flyover ang pagamugnaon aron nga diretso na ang pagdagan sa mga sakyanan.

Gipahibalo ni Mayor  Tomas Osmeña nga gisugdan na diay sa kadagkoan sa Department of Public Works and Highways (DPWH) ang mga technical studies alang sa pagtukod og labing menos 25 ka flyover ug mga underpass sa lainlaing dapit sa Mandaue ug dinhi sa dakbayan sa Sugbo. Ang 10 ka flyover adto sa Mandaue tukoron, ug ang 15 anhi sa siyudad.

Kon mahuman na kining mao nga mga proyekto, makatabang kini nga maluagluag ang kadalanan kay imbes maghunong ang mga sakyanan sa usa ka eskina nga magpaabot nga makalusot, diretso na man unya ang dagan sa mga sakyanan. Sa sitwasyon karon nga pipila ra ang mga flyover, mohunong ra gihapon ang mga sakyanan inig-abot sa sunod nga mga eskina nga wala’y flyover.

Tukma ang gihimo ni Mayor Osmeña nga naninguha g’yud nga ang nasudnong kagamhanan, pinaagi sa DPWH, makagahin og budget alang sa daghang mga proyekto nga makatabang sa pagsulbad sa nagkagrabe nga problema sa trapiko dinhi sa mga dagkong dakbayan sa Sugbo.

Unta, ang nasudnong kagamhanan pinaagi sa Land Transportation Office (LTO) ug Land Transportation Franchising and Regulatory Board (LTFRB) estrikto na g’yud unta nga mopatuman sa mga lagda nga ang mga dunot na nga sakyanan, dili na tugotan nga makadagan sa karsada.

Kinahanglan usab nga estriktuhon ang paghatag og lisensya sa mga drayber aron kadto ra nga mga buotan ug dili abusado nga momaneho og sakyanan maoy maisyuhan og driver’s license. Adunay balaod nga naglatid niini apan wala lang ipatuman. Kon kini himoon sa kagamhanan, sigurado nga maibanan og gamay ang problema sa trapiko.