Masub-anon nga kasaulogan

Dakong kasub-anan ang misakdap niining kasaulogan sa Press Freedom Week sa industriya sa media sa Sugbo gumikan sa linuog nga pagpatay sa usa sa mga miyembro sa Kapisanan ng mga Brodkaster sa Pilipinas dinhi.

Napalgan nga wala na’y kinabuhi si Maxi Bolongaita sulod sa apartment nga iyang giabangan didto sa Barangay Busay ning dakbayan sa Sugbo. Pagpanulis ang gitan-aw karon sa kapolisan nga nag-unang motibo sa iyang kamatayon.

Base sa ilang imbestigasyon, nagtuo ang kapolisan nga misukol ang biktima batok sa iyang mamumuno, kinsa giingon nga usa ka habal-habal driver sa silingan nga barangay sa Lahug. Apan wala’y swerte tungod kay napusilan kini ug namatay.

Hinuon maayo na lang tungod kay pipila ka oras gikan sa mao nga insidente, nasikop dayon sa kapolisan ang suspek nga si Reynante Mambiar kinsa adunay mga samad agi sa kutsilyo gumikan usab sa pagsukol ni Bolongaita. Nakatimaho ako og druga nga maoy hinungdan sa maong insidente. Sa akong tan-aw sa litrato sa maong suspek, dako ang posibilidad nga tiggamitan kini og druga. Samot akong pagduda nga adik kini tungod usab sa mga patik niini.

Ako nagtuo nga sa wala pa kini mikatkat sa apartment ni Bolongaita, misuyop na og druga ang maong suspek. Base sa rekord sa otoridad sa susama’ng insidente, mayoridad sa mga suspetsado high gayud sa druga samtang nagbuhat sila sa krimen.

Kon tinuod kini’ng akong pangagpas nga usa ka drug addict kining maong suspek, dako gayud siya nga hulga sa katilingban, ilabi na nga usa kini ka drayber og habal-habal. Basin usab kon daghan na kini og nabiktima sa iyang mga pasahero.

Maayo na lang nga natiklo dayon ang maong suspetsado human sa maong krimen. Kini aron nga dili na usab kini makabiktima og lain pa nga kinabuhi. Apan subo usab nga palandungon nga ang iyang hinanggaw nga binuhatan mikalas na og usa ka kinabuhi.