Unsaon pag-transfer sa gidonar nga property?
Dear Atty. Divine,
Duna ko’y pangutana may labot sa property nga gustong ihatag sa akong lola nako. Ang akong lola maoy nagpadako nako kay nanarbaho man sa gawas sa nasud ang akong mama ug patay na man ang akong papa.
Mi-graduate nako sa college ug gusto unta sa akong mama nga moapas ko niya sa gawas apan wa ko mosugot kay tiguwang na ang akong lola ug wa’y moatiman niya. Ang akong lola adunay daghang property ug gusto niya nga ang among gipuy-an karon nga house and lot, iyang idonar nako.
Naa na kanako ang titulo sa property. Unsa’y akong buhaton aron ma-transfer kini sa akong pangalan? Daghang salamat. — Lyca
Dear Lyca,
Ang una nimo nga buhaton mao ang pagpahimo og Deed of Donation sa abogado alang sa property nga ihatag sa imong lola kanimo. Kinahanglang pirmahan sa imong Lola ang Deed of Donation ug mopirma sab ka niini isip acceptance kon pamatuod nga imong gidawat ang property ug dayon ipanotaryo.
Human niini, imong i-submit ang maong dokumento sa BIR alang sa pagpa-compute sa Donor’s Tax. Kon imo na kining mabayran, ilang i-process ang Certificate Authorizing Registration (CAR) ug ini’g release sa BIR niini, imong i-submit sa Register of Deeds aron mabalhin sa imong pangalan ang titulo. Thanks and God bless. -Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina @yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
