EDITORYAL - Political will

Dili gayud makalikay ang mga opisyal sa dakbayan sa Sugbo atol sa administrasyon ni kanhi mayor Michael Rama ug karon ubos sa administrasyon ni Mayor Tomas Osmeña nga maoy mabasol nga wala masulbad ang paglunop ug pagbaha sa mga lupa nga bahin sa siyudad kon dunay uwan. Sila si Rama ug Osmeña pulos walay “political will” nga mopatuman sa balaod aron papahawaon kadtong nagpuyo sa daplin sa kasapaan.

Ang nasudnong kagamhanan nitagana og P700 milyones aron gastuhon sa mga anti-flood ug drainage projects dinhi sa dakbayan. Ang maong pundo gipaagi sa Department of Public Works and Highways (DPWH) apan magamit kini aron igasto nga ang mga pamilya nga nagpuyo sa tampi sa kasapaan, ilabi na ang Parian Creek, mahiklin sa laing lugar. Ang tumong niini aron nga ibalik ang orihinal nga gilapdon ug ang giladmon sa mao nga sapa.

Ang gitawag og Estero Parian, o Parian Creek, mao ang sapa nga anaa magsubay ilawom sa mga department store diha sa dalan Colon nga lisud na kaayo mapalawman, ug labaw na nga lisud na mapalapdan kon wala’y political will ang mga nagdumala sa atong kagamhanan. Wala magkuwang ang media, ilabi na ang Banat News, sa pagtuki niining mao nga isyu aron mapabuka ang kahibawo sa atong mga opisyal, apan wala sila magtagad.

Adunay mga higayon nga ang dakbayan sa Sugbo mopagahin og minilyon ka pesos nga salapi aron kunohay paladman ang sapa, apan ang gikuha nila nga pribadong kontraktor nga ang uban niini kaklase ra sa mga engineer sa City Hall, mopalawom ra sa kabahin sa sapa nga anaa daplin sa karsada, ug wala kini himoa sa mga dapit nga dili na makita sa mga tawo.

Kini maoy nakaingon nga bisan og hinay ra kaayo ang pag-uwan apan molungtad og usa ka oras, maglunop na dayon ang atong downtown area kay mosugwak na ang tubig sa Estero Parian paingon sa mga karsada. Ngano nga mahadlok man sila nga mopapahawa sa mga nagpuyo daplin sa sapa?