Dako ang kalainan

Sa paghinumdom kagahapon sa ika-45 nga kasumaran sa deklarasyon sa martial law sa nasud, miulbo ang dako’ng protesta batok kuno sa mura’g diktador nga pagkupot sa renda sa pangagamhanan ni Presidente Rodrigo Duterte.

Natumong usab kini sa National Day of Protest nga gideklara ni Duterte.

Sa iyang deklarasyon, wala’y klase sa mga pampubliko nga tulonghaan ug sirado ang mga opisina sa kagamhanan sa tibuok nasud apan pabilin nga abli ang pribado nga sektor.

Hinuon usab makapangutana kita sa atong kaugalingon kon ato ba nga tugotan nga mobalik pa kadtong mangiub nga kasaysayan sa nasud. Wala gayuy makatugot niini, ilabina nga nakaamgo na ang tanan sa hilabihan ka dako sa kadaut nga dala niadto.

Daghan ang nagkumpara sa administrasyon ni Duterte nga susama kuno sa diktadorya nga rehimen ni Ferdinand Marcos, kinsa sulod sa 20 ka tuig nga mipanamastamas sa dungog sa atong nasud uban sa iyang mga alipures.

Apan sa akong tan-aw layo ra ang kalainan tali ni Duterte ug ang kanhi diktador. Niadto’ng panahon sa Martial Law, napuno sa corruption ang nasud sulod sa taas nga panahon. Kini ang hinungdan sa grabe nga pagkahagba sa ekonomiya.

Niining administrasyon ni Duterte, ang corruption maoy nag-una nga girumbo sa kagamhanan. Gani sentro kini sa krusada sa presidente paglambo pa sa ekonomiya sa nasud. Daghang dagko nga isda sa gobiyerno ang mismo ang nabisto karon ug nalagpot gayud sa katungdanan.

 Ilalum sa pamunoan karon ni Duterte, libre ang tanan pagpadayag sa ilang gibati. Gani gideklara gayud sa presidente nga usa ka holiday ang kasumaran sa deklarasyon sa Martial Law aron libre ang tanan pagpadayag sa ilang protesta.