Gideklarar

Gideklarar ni Presidente Rodrigo Duterte nga National Day of Protest kagahapong adlawa, dungan sa paghandom sa ngitngit nga kagahapon sa martial law. Wala ug tuo ang lihok protesta nga gilusad sa nagkadaiyang grupo sa nasud ug wala usab magpaulahi dinhi sa Sugbo.

Gisinggit nila ang mga sentimento, ilabi na kadtong nakasinati sa mangtas nga kuko sa balaod militar 45 ka tuig na ang nakalabay, human sa deklarasyon sa martial law ni kanhi diktador Ferdinand Marcos. Mas daghan ang mipadayag sa ilang kabalaka ug kahadlok nga ang kangitngit nga nasinati kaniadto sa rehimeng Marcos mabanhaw sa Duterte administration.

Gani gipanag-ing nila si Duterte kang Marcos tungod sa mga patakaran nga gipatuman niini, sama sa wala’y hunong nga pagbanaw sa dugo gumikan sa gihingusgang kampanya batok sa mga durugista. Apan asa na man ang atong nasud karon kon itandi nato sa mga nangaging administrasyon? May kalainan ba ang pagdumala sa mga namunoan kanhi?

Ngano, wala ba’y nahimong kalapasan sa tawhanong katungod sa pamunoan sa mga presidente nga mipuli ni Marcos? Seguro, ang dayag kaayo nga nahitabo mao ang paghatag og sobrang kagawasan sa katawhan nga naabusaran. Tungod niini, milipang ug mikuyanap ang mga dagkong suliran sama sa ilegal drugs nga nataligam-an o ba kaha gipasagdan lang kay gihimong gatasan sa mga kurakot nga opisyal sa gobiyerno.

Sa isyu sa kurapsyon, dako ug kalainan kay sa una, si Marcos lang apan ang mga misunod kaniya apil ang mga gaway nahimong dagkong bitok nga misupsop sa bitamina nga alang unta sa katawhan. Dili man perpekto ug aduna may lapses ang pamunoan ni Duterte, apan siya lang ang mibangga sa epidemya sa drugas sa nasud.

Ako mismo dunay ikasaway kang Digong tungod sa iyang palisiya nga sama sa usa ka diktador, apan gikinahanglan kini aron siya tuohan.

Kon i-”baby” gud ning nga daotan sa katilingban, sayon ra kaayo ka nga tumban ug pigsaton. Katungod natong tanan ang magprotesta apan seguraduhon nato nga tinud-anay kini pinasubay sa atong gibarugan nga prinsipyo. Apan angayan natong matngonan kay basin nagamit na kita sa interes sa kaaway sa nasud. Kinsa man ni sila? Nag-una ang mga drug syndicates nga nabakol karon tungod ni Digong.