Giminten ang sakit

Sagad sa pagkakaron, mao na’y nasilsil sa atong hunahuna nga kon kita magkasakit, kinahanglan gayud nga iminten ang tambal niini.

Nagpasabot kini sa pagminten sa sakit, nga aron dili mograbe ug mokomplikar og laing mga sakit. Husto man kini, kay sagad sa mga tambal, mao la’y gitumong una ang pag-ayo sa mga sintomas sa sakit ug ang epekto sa kadaot niini.

Apan ang hinungdan gayud sa pagkasakit, nakomplikado nga lisud na subayon nga ayuhon, mao nga kanunay balikan sa sakit. Nag-umido nga momugna pag-usab og laing sintomas sa mao gihapong sakit, hangtud nga mosaka ang lebel sa sakit ngadto sa kanser, ilabi na halos mga medikasyon nga giminten, nagbaton og mga sayd-epek, nga kini nakapasamot sa problema sa nagkasakit.

Sagad raba sa maapektohan sa atong lawas mao ang atay ug kidney, nga labihan nga naum-om sa gisalang toksik nga kemikals sa tambal. Busa dili batasanon nga modagan sa botika kon unsa’y imnon. Moepekto ni sa bag-o pa, apan kon maimyun na’s tambal, magkadugay dili na kini mopatuo sa imong gipamati.

Busa kon nagminten kita’g mga tambal sa mga sintomas, tinguhaon sab ang pagminten sa kahimsog sa lawas nga ang pagpasagad niini, maoy kalagmitan nga hinungdan ngano nga kita nagkasakit. Ang pagpakabana sa pagkat-on sa husto ug angay nga pagkaon, maoy pagtambal sa sakit nga wa’y sayd-epek.

Hasol iminten ang kahimsog sa lawas kay magmatngon man kita sa pagkaon nga makontrol gayud nga dili makapatuyang. Apan mas hasolon kita sa kasakit nga paantuson kita sa inagulo, nga dili pakatulgon sa giminten nga sakit, nga sa Dios na lang itugyan ang paglaum, nga kita kaloy-an nga papahulayon.

Samtang may higayon pa, mangaliya kita sa Kahitas-an nga maila ang kabililhon sa kahimsog sa lawas, kaysa pagpasagad nga magminten og sakit.