Duterte bakakon

Sa laing higayon, nabulgar na usab ang pagka bakakon ni Presidente Duterte human niya giangkon nga dili diay tinuod ang gibutyag niya nga giingong bank account ni Senador Antonio Trillanes IV sa usa ka bangko sa gawas sa nasud.

Pastilan, nakagasto g’yud hinuon si Trillanes sa pag-adto niya sa Hong Kong aron lang g’yud pamatud-an nga dili tinuod ang gibulgar ni Duterte nga bank account nga giingong adunay dakong deposito ug iyang gipanag-iya.

Aron lang g’yud pagdaot ni Trillanes, gibuhat-buhatan ni Duterte og pasangil hinungdan nga ang kadaghanan sa 16 milyones ka botante nga misuporta kaniya sa miaging eleksiyon, mituo sab g’yud.

Karon kay giangkon na man ni Duterte nga naghimo-himo ra siya og sugilanon, unsa kaha karon ang ikasulti sa mga Duterte supporters? Para kanako, dili g’yud maayo ang gihimo ni Duterte tungod kay isip presidente sa nasud, siya unta ang magsilbe nga sumbanan.

Unsa man diay ang gusto nga ipasunod ni Duterte ngadto sa katawhan sa nasud, ang pagka bakakon? Akong balikon nga daghang proyekto ni Duterte dihang mayor pa siya sa Davao City akong gidayeg.

Gani gusto nako nga ang uban sa iyang mga pamaagi sa pagdumala sa Davao City dihang siya pa ang mayor, maayong sundon usab dinhi sa dakbayan.

* * *

Karong adlawa, magtigum ang mga opisyal sa Team Rama aron hisgotan nila kon kinsa ang ilang ituboy ngadto kang kanhi bise presidente Jejomar Binay aron ipuli kang Cebu City Councilor Nendell Hanz Abella nga mi-resign sa katungdanan.

Nangangkon si kanhi mayor Michael Rama nga aduna sila’y koordinasyon ug ni Binay nga maoy dunay katungod pag-nominate og puli sa mabakanteng pwesto kay si Hanz Abella sakop man sa Team Rama nga alyado sa United Nationalist Alliance (UNA).

Matud ni Rama nga diskutihon g’yud nila karon kon kinsa ang angay’ng ihulip kang Abella, apan gitataw niya nga dili g’yud siya maoy mohulip sa mabakanteng pwesto.

Ang tunog g’yud kaayo sa mga tabi-tabi mao nga si Junjun Osmeña nga anak ni kanhi Cebu City vice mayor Renato Osmeña, maoy numero uno sa listahan. Sa ako g’yud hinoong tan-aw nga seryuso si Junjun Osmeña sa pagserbisyo ug siya maoy angay nga ituboy sa Team Rama.

Gibiyaan gud ni Junjun Osmeña ang nindot niyang trabaho pagka manager sa Pagcor-Parkmall branch, kay milansar pagka konsehal sa miaging eleksiyon, apan wala la’y swerte.

Karon mao na ang higayon ni Junjun nga makaserbisyo kon siya ang mapili ug ituboy ni Binay, unya maoy itudlo ni Presidente Duterte.