Kinsa’y mo-CHR sa mga taga-CHR?

Ang kaabtik sa utok ni Presidente Duterte nahimong gikabiliban sa kadaghanan apan gikalagotan sa pipila. Makadaghan na nga higayon nga kon mobuka sa iyang baba ang presidente, ang iyang mga kritiko sa oposisyon, ilabi na kadtong mga tawo nga mikontra g’yud niya, mosaway gilayon kaniya.

Niadtong miaging semana, nanggawas sa social media ang mga estorya nga ang mga kritiko ni Duterte (adunay madre, abogado, party-list congressman, artista, uban pa) nagplano nga molusad og halapad nga protesta ug itayming sa Septiyembre 21 nga anibersaryo sa Martial Law.

Dungan ning mga estoryaha, miluwat og pamahayag ang kalihim sa depensa nga si Delfin Lorenzana nga ang pagdeklarar og martial law “sunod semana” dungan sa anibersaryo niini makuli kaayo. Sunod niini ang pahibalo sa NDRRMC nga himoon ang nasudnong earthquake drill. Apan niadtong miaging adlaw, si Duterte mismo ang mideklarar nga ang Septiyembre 21 usa ka “day of protest” ug miawhag sa mga tawo nga adunay reklamo batok sa gobiyerno sa paggawas ug pagsalmot sa protesta sa kadalanan.

Kay nagliba man ang desisyon sa NDRRMC ug ang deklarasyon sa presidente, ang NDRRMC mismo ang miingon kagahapon nga gioktaba nila ang national earthquake drill. Usa ra g’yuy masulti nako ning maong panghitabo: nga bilib ko sa taktika sa presidente. Kay nagplano man ang iyang kritiko nga magmartsa sa kadalanan ugma, siya na mismo ang mideklarar nga “day of protest” ang maong adlaw ug pag-awhag sa mga tawo sa pag-apil.

Sa ato pa, ang mga protesta nianang adlawa molutaw nga adunay bendisyon sa gobiyerno, ug nga pinaagi niini, ang mga tawong adunay reklamo batok sa gobiyerno mahimong makasaba-saba niining adlawa. Busa bisan unsang panawagan batok sa iyang administrasyon, ilabi na ang panawagan pagpalagpot kaniya malisod na nga mosaler.

* * *

Sa gikaingon ko na sa miagi nakong lindog, ang desisyon sa mga magbabalaod paghatag og P1,000 nga budget sa Commission on Human Rights alang sa 2018 dili seryoso. Paagi lang kini aron mapaabot sa mga tawo ang mensahe nga ang CHR gigamit ni chairman Chito Gascon pag-atake sa administrasyong Duterte.

Apan aduna gihapo’y mga tawo nga wala makasabot sa mensahe sa mga magbabalaod. Daghan gihapon ang miingon nga dili mahimong hilabtan ang CHR kay independente kini nga organisasyon sumala sa gimbut-an sa balaod.

Pananglit nakadaot na sa human rights sa kapolisan ug kasundalohan ang CHR, asa man kita modangop? Dili lang nato sila hilabtan kay lagi protektado sila sa Konstitusyon? Mao tingale nga nagsalig lang si CHR chairman Gascon, nga bisan og nasubrahan na ang iyang paggamit sa CHR pagsaway sa presidente ug sa mga programa niini batok drugas.

Sama sa Ombudsman. Pananglit magbinuang ang mga taga-Ombudsman, kinsa may mopa-ombudsman nila?