EDITORYAL - Habal-habal wad-on?

Kontrobersiyal kaayo karon dinhi sa dakbayan sa Sugbo ang isyu kabahin sa pagdagsang sa mga motorsiklo nga gigamit isip pasaheroan– kining gitawag sa uban og “habal-habal.” Daghang driver sa mga passenger jeepney nangreklamo na kay ang mga habal-habal mosulod bisan sa mga dapit nga adunay rota ang PUJ, ug nakaiban kini sa ilang mga pasahero.

Wala’y lalis nga ang usa ka sakyanan kon gamiton na gani sa pagpamasahero, kinahanglan g’yud nga kuhaan og permit gikan sa Land Transportation Franchising and Regulatory Board (LTFRB). Apan ang mga motorsiklo dili apil sa mga sakyanan nga mahimong kaisyuhan og permit aron gamiton sa pagpamasahero.

Ang mga tricycle-for-hire gihatagan og prangkisa sa mga Local Government Unit (LGU) kon diin kini mamasahero. Ingon usab niini ang mahitabo kon may balaod pa nga magtugot nga ang mga motorsiklo mahimong gamiton sa pagpamasahero. Apan bisan og may prangkisa pa ang habal-habal, mahimo gihapon nga dakpon ang driver kon mopasakay og subra sa usa.

Sagad karon sa mga driver og habal-habal dili na mopasakay og subra sa usa ka pasahero, ug pasul-ubon na usab nila og crash helmet ang moangkas kanila. Kon imong hinuktokan pag-ayo, dili na g’yud angay’ng gukdon pa sa kagamhanan kining pag-operate og habal-habal.

Gitugot sa balaod sa transportasyon nga ang usa ka motorsiklo masakyan og duha ka tawo, apil na ang driver. Kon ang mga sakay sa motorsiklo pulos lang nagsul-ob og crash helmet, unya hitsas sa dukomento ang motor, ug lisensyado ang driver, nganong estriktuhon pa man g’yud sa mga opisyal ang operasyon sa habal-habal?

Hinoon, ang mga opisyal sa LGU, sama sa dakbayan sa Sugbo, angay g’yud nga mohimo og lagda kon pila ang plite nga kolektahon sa mga nagmaneho og habal-habal aron dili maabusohan ang mga sumasakay.

Angay usab nga ang mga driver sa habal-habal mo-undergo g’yud og bansay-bansay aron dili mabutang sa peligro ang mga mosakay kanila.