Damgo sa buntag ni Mike Rama

Nagdamgo og buntag. Buta nga nagdamgong makakita og balik. Amang nga nagdamgong mokanta sa singing contest. Mao kini ang sitwasyon sa pagpalutaw sa ngalan ni kanhi mayor Mike Rama isip hulip sa mi-resign nga si Konsehal Hanz Abella nga gitudlo ni Presidente Duterte isip commissioner sa National Labor Relations Commission.

Dili g’yud mahitabo nga si Rama ang itudlo ni Presidente Duterte. Aw kon mayabag si Duterte, iyang itudlo ang kanhi mayor nga anaa sa iyang listahan sa mga narcopoliticians ug makapila niya hinganli. Si Rama ug ang iyang mga kauban sa Barug Team Rama, nasayod nga makuli nga ang kanhi mayor ang itudlo ni Duterte.

Usa pa, kinsa man ang mo-endorso sa ngalan ni Rama didto sa Office of the President aron mapirmahan ni Duterte ang appointment? Nagtuo ko nga lakip si Presidential Assistant for the Visayas Mike Dino dili mobitbit sa endorsement ni Mike.

Subay sa proseso, ang nabakante nga puwesto ni Hanz hulipan sa kauban niya sa partido. Kay ang United Nationalist Alliance (UNA) man ni kanhi bise president Jejomar Binay man ang partido ni Hanz, sa ato pa, kauban niya sa partido maggikan ang ngalan nga iduso ni Duterte.

Tulo ka ngalan ang interesado sa puwesto. Sila mao si Junjun Osmeña, Kapitan Lotlot Soon, ug Konsehal Gerry Auxilio sa Quiot. Ika-upat unta si Rama pero maayong dili na lang siya mag-apil-apil mentras naa pa ang iyang ngalan sa listahan sa mga narcopoliticians nga gihinganlan sa presidente.

Adunay estorya nga gamiton ni Rama ang kahigayonan paghulip kang Hanz nga malimpyo niya ang iyang ngalan ug mapapas sa listahan ni Duterte. Usa ra g’yuy akong tambag niya: pagpuyo! Busa nagtuo ko nga kanang balita nga ituboytuboy ang ngalan ni Rama isip hulip ni Hanz, paninguha lang sa BOPK aron adunay mahisgotan ang mga tambolero ni Mayor Tomas Osmeña pagdaot sa numero uno niyang kontra, si Dino.

Nahinumdom lang hinuon ko sa hitabo dihang si Ermita Barangay Kapitan Imok Rupinta gisuspenso sa Ombudsman kay lagi wa makatuman sa kasugoan paglimpyo sa drugas sa iyang barangay. Abi kay nakabuka sa iyang baba si Imok nga ang buhatan ni Dino ang nangita’g ihulip niya, gigamit kini ni Tomas aron iduot og kiha si Dino sa Ombudsman, bisan wala g’yud mag-apil-apil si Dino sa isyu sa Ermita.

Siya hinuon ang interesado kaayo sa Ermita nga iya g’yud gipalingkuran sa iyang paboritong polis. Karon nga wala na si Hanz, mahibalik na sa kampo ni Bise Mayor Edgar Labella ang mayoriya. Si Labella ang giisip nga labing lig-on nga haligi sa oposisyon sa siyudad sukad nagupokgupok ang gahum ni Rama. Ang kaligdong ni Labella sarang nga ikaparang sa makalibog nga pamatasan ni Osmeña.