Mabuhi ang prensa sa Sugbo!

“Alang sa tanang magsisibya sa radyo ug telebisyon, mga magsusulat, ug tanang mga nanarbaho sa media, nga ang Dios maghatag kanila og kaalam, ug magpuno kanila sa Espiritu Santo aron magmaisugon silang magsangyaw sa kamatuoran diha sa pulong ug sa buhat. Mag-ampo kita sa Ginoo”.

Kini ang tipik sa pag-ampo nga akong gibasa atol sa misa sa Press Freedom week celebration kagahapong adlawa didto sa University of San Carlos Boys High.

Tanang media organization ang mitambong sa kalihokan nga gisugdan sa parada gikan sa Fuente Osmeña rotunda.

Sa akong gibasa nga pag-ampo, makita ang pagpangayo og kaalam ug giya sa Espiritu Santo, nga gikinahanglan kaayo nato sa atong trabaho.

Labaw sa tanan, ang proteksyon gumikan kay nabutang karon sa dakong hulga ang atong bokasyon gikan sa pagpig-ot mismo sa atong mga news sources. Ning bag-o lang, gihikawan ang media sa pagkuha og spot report gikan sa atong kapolisan. Base kuno kini sa memorandum kanila niadtong tuig 2014.

Gusto sa PNP nga press release lang ang ilang ihatag nga dili g’yud kini matulon sa atong propesyon nga hungitan na lang sa gusto nga ipakaon sa atong mga tinubdan.

Bisan pa man sa mga hulga ug kakuyaw, wala magpatarug ang prensa sa Sugbo sa pagbarug sa atong prinsipyo nga dili magpagawong ni bisan kinsa.

Isip sakop sa Cebu media, garbo nako nga mahimong dalan sa kasayoran nga wala’y kahadlok ug wala’y gidapigan tungod ug alang sa atong prinsipyo nga gibarugan.

Mabuhi ang prensa sa Sugbo!