Wa pay seguro ang BRT?

Sa akong hinumdoman kaduha na aprobahi ang BRT. Sa una, gi-question ni sa mga kaatbang sa politika ni Mayor Tomas Osmeña, apan, wala ma-scrap ang proyekto, kaylagi, mahimo man nga magdungan ang BRT ug ang LRT.

Karong bag-o, naaprobahan na usab ang BRT tapos kadungagi’g P5.7 billion ang pundo niini, busa, “GO “ na gayud ang proyekto. Apan, ang city council, buot mo-review o motuon pag-usab sa feasibility study sa BRT.

Nagpasabot nga kon ilang makita nga dili feasible ang proyekto, kay lagi mas feasible ang LRT, ila bang sultihan ang NEDA, ang World Bank, ang BOTr, ug ang ubang ahensiya nga may kalabutan sa mga pagtuon pagka-feasible sa proyekto … nga sayop silang tanan?

Ang pag-approve sa dugang pundo, matud ni Atty. Rafael Yap, BRT project director sa BRT, nagpasabot nga mapadayon na gayud ang proyekto bisan pa sa mga pagsupak sa pipila ka sector.

Midugang pagpamahayag si Yap nga ang pagpadayon sa proyekto “also signifies the commitment of the Duterte administration’s Build, Build, Build program of infrastructure development which the Cebu BRT project is part,”

So, it seems nga ang atong konseho buot usab mo-enter the dragon, buot mo-review sa mga feasibility studies nga gihimo. Akong kuyawan nga kon dili sila makontento sa mga feasibility studies, sila mismo ang mosupak ning maong proyekto.

Kuyawan niini ang DOTr ug ang NEDA Board nga gipangulohan ni Presidente Digong Duterte (?) Ngilngiga sa Cebu City Council no?

Hain may maayo nga sugdan na nato karon ang makuti nga pagtuon sa LRT, ang pagka-feasible niini asa kini agi, pila ang gasto, asa nga bangko manghulam, kanus-a sugdi ug kanus-a mahuman? Pila ka sumasakay ang maka-benefit niini, ug pila ka oras ang ma-save sa travel time, etc., etc., etc.

By the time magsugod na kita sa LRT, mahuman-human na ang BRT, ug lagmit maka-operate na kini partially. Di ba nindot? Nganong ato pa man kining awayon karon tungod lang kay ang uban kanato wa ganahi ni Tomas? Pastilan!

In the meantime, alang sa atong konseho maayo tingali nga ilang sulbahon kining illegal operation sa Habalhabal ug Angkas. Lisud hinoon ni kay pila ni sila ka botante, ug di lang hibaw-an mag-2019 election.

* * *

Ambot kanus-a gyud kaha mahitabo kining gi-expect sa MCWD nga  dugang 20,000 cubic meters (cu. m.) per day nga ilang ikatapak sa water shortage karong panahona.

Kami diri sa Guadalupe, dugay nang nag-antos sa kanihit ug kawalay tubig.