Banat ( Leaderboard Top ), pagematch: 1, sectionmatch: 1

Dili angay ipiton

Usa ako sa daghan nga wala makauyon sa taras sa Commission on Human Rights tungod sa sige niining kastigo sa administrasyon ni Presidente Rodrigo Duterte, ilabina niini’ng gihingusgan nga kumbati batok sa negosyo sa ilegal nga druga.

Apan dili usab makatarunganon ang P1,000 nga gigahin sa Ubos Balaybalauran sa komisyon alang sa budget niini sa sunod nga tuig. Klaro nga kastigo kini sa sige nga banghag sa CHR sa giingon nga extrajudicial killings niining anti-drug campaign sa kagamhanan.

Anaa bay ahensiya nga maka-operate og P1,000 nga budget sa usa ka tuig? Bisan ang barangay, ang labing gamay nga local government unit, nagkinahanglan pa gani og gatusan ka libo alang sa tarong nga paghatud og serbisyo ngadto sa katawhan.

Tungod lagi sa kadaghan sa mga itoy sa administrasyon diha sa Ubos Balaybalauran mao nang sama na hinuon sa diktador ang nagkupot sa renda ning ato nga pangagamhanan. Dili kini maayo nga talan-awon alang sa usa ka nasud nga adunay himsog nga demokrasya.

Hinaut nga makahunahuna niini ang mga senador ug ilang barawon ang hinanggaw nga desisyon sa mga kongresista. Kini aron nga mabalik sa naandan ang budget sa maong komisyon ug nga maka-operate kini sa normal ilalum sa lagda niini.

Angay usab nato nga sabton nga trabaho sa CHR ang pagbatikos sa otoridad kon tan-aw niini nga subra ug nakalapas na usab sa balaud ang ilang binuhatan. Gituyo kana pagmugna sa atong Konstitusyon aron nga maduphan ang tawhanon nga katungod sa matag usa.

Hinuon dili gayud usab perpekto ang maong komisyon. Daghan kini og desisyon nga sobra ug wala sa lugar. Gani mora kini og iro’ng buang nga sige og paghot sa kapolisan sa ilang mga operasyon, ilabina kon adunay kinabuhi nga makalas.

Atong nakita nga overacting ra ang CHR niining gubat batok sa druga ning kasamtangan nga administrasyon. Apan mao kana ang trabaho sa maong komisyon. Ug dili angay usab nga ipiton ang budget niini tungod lamang sa kahilabtanon sa maong ahensiya.

  • Follow Us: