Tawhanong katungod panalipdan

Unsa man ang mahimo sa 1,000 pesos nga budget sa Commission on Human Rights (CHR)?

Sama ra kini sa gipapas na sa kongreso ang naasoy’ng ahensya gumikan sa kagamay sa pundo nga ilang gihatag. Dili man gani ni matawag nga budget kun dili bugal-bugal ug insulto ngadto sa CHR.

Pakapinan pa og sakit nga pulong gikan mismo sa Speaker of the House nga si Pantaleon Alvarez nga sa mga kriminal papangayoon og budget ang CHR kay mao kini ang ilang gidapigan.

Unsa man ang nakaon sa utok sa atong mga magbabalaod nganong nisugot man intawon sila nga mamahimong robot sa gustong mahitabo sa ilang liderato sa kamara?

Sila ang mga eksperto sa balaod kay sila mao man ang tigpanday niini apan gitaptapan nila ang ilang mga mata kay gipatigbabaw ang ilang kaugalingon nga interes ug gikalimtan ang interes sa katawhan nga ilang girepresentahan.

Sila nasayod ug nakasabot sa mandato sa CHR nga maoy manginlabot sa mga pagpangabuso nga nahimo sa mga opisyal sa gobiyerno lakip na ang kapolisan nga nabutang karon sa hot spot tungod sa isyu sa pagpamatay sa mga nalambigit sa drugas.

Sa Sugbo, tulo ra ka mga kongresista ang mibarog ug miprotehir sa katungod sa ilang mga konstituwente pinaagi sa pagsupak sa 1,000 pesos nga CHR budget.

Kudos nilang Congressman Raul del Mar, Willie Caminero ug Aileen Radaza nga wala mahimong robot gibarugan ang ilang kaugalingong prinsipyo dili ang kaalyadong partido sa politika. Ang gihimo sa Lower House sama ra sa ilang gipapas ang CHR tungod kay wala man nila hatagi og pundo nga maoy gusto nilang mahitabo.

Kong wala na ang ahensya asa na man dagan ang mga yanong tawo nga mabiktima sa pagpangabuso sa mga kawani ug opisyal sa gobiyerno?

Ang uban nagmaya sa gidangatan sa CHR apan wala nila pamalandongi unsa ang sangpotanan niini sa higayon nga sila na ang mabiktima sa human rights violation.

Mahinungdanon kaayo ang atong tawhanong katungod busa angayan nato kining panalipdan pinaagi sa paghatag nato og importansya sa ahensya nga maoy atong kadangpan sa panahon nga kita nanginahanglan.