Banat ( Leaderboard Top ), pagematch: 1, sectionmatch: 1

Arellano Boulevard giabusohan

Gidayeg nako ang kapolisan dinhi sa dakbayan sa Sugbo kay sa miaging semana, paspas kaayo ang ilang kampanya batok sa mga video karera ug moli-moli, apan mura’g kiyugpos man sila sa illegal swertres.

Ngano nga wala man ninyo pangdakpa ang mga nagpasiugda niining illegal swertres? Daghan kaayo ang mga illegal booking outlets sa illegal swertres dinhi sa dakbayan ug mga silingan nga dapit sa Metro Cebu.

Unya, samtang gihingusgan sa kapolisan ang kampanya batok sa illegal gambling machines dinhi sa dakbayan, miundang man ang kapolisan sa Talisay City sa paghimo’g kampanya bisan og pwerteng daghana nga video karera ug moli-moli diha sa ilang dakbayan.

Kay “open” na man kanunay ang atong Hotline Numbers, daghan kaayo ang mopahibalo kanato, lainlaing inpormasyon ang atong madawat. Akong awhagon ang kapolisan diha sa Talisay nga lihok g’yud mo pag-ayo. Kangil-ad ba tan-awon nga wala mo’y maayong agi sa kampanya batok sa drugas, karon sa ilegal nga sugal wala sab?

* * *

May mireklamo nako kabahin sa mga miabuso na kaayo nga mga lumolupyo diha sa Arellano Boulevard, unahan nga bahin sa Philippine Coast Guard headquarters.

Milapad na man unta pagbalik ang maong karsada ug kaagian na man gani og daghang sakyanan kaniadto, apan karon mura’g mibalik og kagamay sa karsada tungod sa mapahimuslanong lumolupyo nga gipasagdan ra sa Probe Team.

Ambot lang kon ngano nga kining Probe Team sa dakbayan sa Sugbo wala man g’yud atimana ug gipasagdan ra man sa ilang katapolan. Husto ang mireklamo nako sa iyang paghulagway nga “pakloy” kuno kaayo ang Probe Team kay wala man makahimo og aksiyon niining maong problema.

Bisan og giunsa na lang og saway sa ilang kaligoy, dili g’yud mauwaw kining mga sakop sa Probe Team nga modawat lang sa ilang sweldo nga kutob ra sa pagsakay-sakay sa ilang service vehicle. Nagtuo tingali sila nga ang trabaho sa Probe Team kutob ra sa pag-estambay diha sa dapit sa Basilica del Santo Niño.

Nakadungog ko nga babaye man gud diay ang hepe sa Probe Team, ang clearing team sa City Hall, mao tingali nga hinay kaayo. Apan kon babaye man ang hepe sa Probe Team, mas bentaha pa gani unta kay ang babaye gusto man og hapsay, apan gipasagdan ra man niya nga nagkaguliyang ang ang atong mga aseras?

Porbida nimo ma’am uy, maayo man lang mo modawat og sweldo nga wala’y maayong serbisyo.        

  • Follow Us: