Banat ( Leaderboard Top ), pagematch: 1, sectionmatch: 1

Eleksiyon giuswag

Sa boto nga 213 kontra 10, nahukman sa mga sakop sa ubos balay balauranan ang pag-uswag sa Barangay ug SK Elections unya na sa Mayo 2018.  Tanang mga kongresista nga mitambong sa session mibotar sa House Bill No. 6308 nga naghiusa sa lima ka balaudnon ug usa ka resolusyon nga ang tumong pulos pag- uswag sa eleksiyon.

Ubos sa nauyonan nga balaudnon, ang tanang mga pinili nga opisyal sa barangay, magpabilin sa ilang katungdanan hangtud nga mapahigayon ang eleksiyon sa Mayo 2018. Apan ang Senado bisan uyon sa pag-uswag sa Barangay ug SK Elections gusto nga sa Oktobre 2018 himuon ang eleksiyon, lahi sa nauyonan sa mga kongresista.

Kon ugaling mauyonan sa mga senador ang pag-uswag sa eleksiyon sa Oktobre 2018, maingon nato nga dako pa kini nga trabahoonon sa mga magbabalaod kay gikinahanglan pa nga dad-on sa Bicameral Committee ang nauyonan nga balaudnon sa ubos balay balauranan ug senado aron hiusahon sa dili pa kini iduso ngadto sa opisina ni Presidente Rodrigo Duterte aron iyang pirmahan ug mahimo na gayud nga balaod.

Wa’y lalis, mauswag gayud ang Barangay ug SK Elections kay pareho kini nga giuyonan sa mga magbabalaod sa ubos balay balauranan ug senado. Ang dili lang klaro, kon kanus-a ang sunod nga eleksiyon, kon sa Mayo ba o sa Oktobre sa sunod tuig.

Pero ang Commission on Elections wa mokumpiyansa kay nagpadayon gihapon sila sa ilang pagpangandam sa umaabot nga eleksiyon nga gikatakda karong Oktobre 23. Naniguro lang ang Comelec, ngano man?

Kay dili man gud mauswag ang eleksiyon kon wala’y balaod nga mag-uswag niini. Mao nga kon ang Comelec nakapangandam na daan sa eleksiyon, dili sila magkaproblema kon madayon ang piniliay. Mas maayong mangandam kay sa mokumpiyansa.

  • Follow Us: