Mga hinungdan sa kapakyasan (2)

* Wa’y inisyatibong diskarte — Sa paglampos sa unsa mang butang nga atong buhaton, nagkinahanglan kini’g inantigo’ng inisyatibo sa pagdiskarte. Kay mao kini ang makapaagni’g interes sa pagdasig sa kaugalingon. Nga makahagdaw og pamaagi nga makapaugmad sa ato’ng mga gipangandoy. Daku nga konsuwelo kini kaysa kabalaka nga maoy papuy-on sa kaugalingon.

* Pagduhaduha — Katumbas ra kini sa negatibo’g panghunahuna, nga kanunay mobalda sa mga pagsulay, aron unta sa paglig-on sa paningkamot. Apan ang pagduhaduha, maoy mopaugtas nga kahubsan kita’g enerhiya sa pagpakigbisog, sa hagit niini’ng kinabuhia  nga kita magmalampuson gayud.

* Ang katungod — Dili tanan nga kita sakop sa pundok sa mga tawong palaran diha sa katilingban, nga angayan unta kita makiglambigit kanila. Manginlabot kita kay aduna sab kita’y katungod. Kun unsa’y mahimo nila, wala’y katarungan, ngano kita dili sab makahimo.

* Wala ko’y abilidad o talento — Tungod kay wala ka mobilib sa imong kaugalingo’ng katakos. Gihatagan kitang tanan og talagsaong hiyas sa atong pagkatawo. Wa lang ni nato palamboa sa kaugalingon. Idiskubre mo kini nga gamiton, aron makaingon sila nga dili sab diay malabwan ang abilidad mo’ng maayo nga makigsandurot sa isigkatawo.

* Mubo ra’g hunahuna — Sa laktod, hiktin ra ang ato’ng panghunahuna, aburido ug mubo ra’g pailob. Di kaantigong maminaw nga ayagon ang mga hunahuna sa uban, kay nagtuo siya ra’y husto apan permi diay mapalpak.  

* Nag-usik la’g panahon — Giayran ang pagpakabana nga wala’y pagsusi sa kabililhon sa mao nga kahigayonan, nga maghatud unta’g daku’ng oportunidad nga makaabag sa tinguhang kalamboan nga kita magmalampuson.