Ang tawo walay kausaban

Human sa hurricane Harvey sa Houston Texas misunod dayon ang mas gamhanan nga hurricane Irma sa Florida didto sa Estados Unidos nga parehong nakamugna og grabeng kadaut.

Gikatakda usab mokusokuso ang nagsunod nga hurricane Jose nga nagsubay sa dalan nga giagian sa hurricane Irma.

Makita nato pinaagi sa balita ang kasuko nga gipakita sa kinaiyahan nga dili gyud diay kapugngan bisan sa nasud nga gamhanan sama sa Amerika.

Layo ra man ang Estados Unidos apan duol ra ang posibilidad nga subli kining mahitabo dinhi sa Pilipinas human niadtong super typhoon Haian o Yolanda nga labing gamhanan sa kasaysayan.

Ang pangutana karon kun duna bay nakat-onan ang katawhan sa katalagman nga nasinatian?

Seguro nakakaon na og tagam apan basin baya og nahikalimtan na ang leksyon tungod kay limtanon ra ba kaayo kita tungod kay sobra ra kaayong kompyansa sa kaugalingon ug sa mga panghitabo sa atong palibot.

Dako kaayo ang kalainan sa Amerika ug sa mga third world country sama sa Pilipinas tungod kay bisan unsa ka dako nga katalagman han-ay kaayo ang ilang pre-evacuation process hangtod na sa after care sa mga evacuees.

Lig-on usab ang ilang mga imprastraktura nga gituyo gyud pagdesinyo nga makasugakod sa mga katalagman.

Sa Pilipinas, human sa bagyong Yolanda ambot lang duna bay kausaban, hinaut aduna na aron dili na ingon niadto ka dako ang kadaut kong simbako adunay susama ka kusog nga bagyong moabot.

Usa ra gyud ang gitumbok nga dakong factor nganong ingon na niini ka dako ang kausaban sa mga katalagman nga nagkakusog na mao ang “climate change.”

Apan subo palandongon ang katawhan ra ang walay kausaban sa pagpasagad lang sa pag guba sa atong kalikopan nga nakapausab sa atong kinaiyahan.