Gisulong na ba kita sa China

Sa wala pa mabulgar ang 6.4 bilyones ka pesos nga shabu nga gipalusot sa Bureau of Customs daghan nang shabu nga nasakmit sa atong mga otoridad ang nagagikan sa nasud sa China. Ang gobiyerno sa nasud sa China grabe ka istrikto sa ginadiling drugas.

Gani kamatayon ang ilang silot niini. Walay giila ang China sa ilang patakaran mahitungod sa gidili nga drugas kay bisan ang mga taga laing nasud nga masakpan nga magpalusot niini sa ilang nasud ila gayong gisilotan og kamatayon.

Apan wala estriktoha sa gobiyerno sa China ang pagpagawas sa ginadiling drugas ngadto sa laing nasud sama sa Pilipinas. Unsa may buot ipasabot niini?

Ang mga dagko ug mga gamhanan nga nasud sa kalibotan lain-lain og mga pamaagi sa pagkontrolar sa mga gagmay nga nasud sama na lang sa Pilipinas. Kini kun imo nga ibase sa atong kasaysayan.

Sa dihang miabot ang mga Katsila sa Pilipinas ilang gikontrolar ang atong huna-huna ug mga kasing-kasing pinaagi sa relihiyon. Gani hangtod karon nagpabilin man gihapon ang gibilin kanato sa mga Katsila.

Sa dihang miabot sa Pilipinas ang mga Amerikano ila usab nga gikontrolar ang atong mga huna-huna ug mga kasing-kasing pinaagi sa edukasyon. Mao kini ang hinungdan nganong hangtod karon imong maobserbahan ug makita nga daghan sa mga pinoy ang mas Amerikano pa kay sa mga tinuod gayod nga Amerikano.

Ang China nga gihigala sa gobiyerno ni Presidente Rodrigo Roa Duterte ug mihatag og dagko nga ayuda sa nasud naglaraw ba sa pagkontrolar sa mga Pinoy pinaagi sa gidili nga drugas? Laraw ba sa nasud sa China ang pagkontrolar sa atong huna-huna ug kasing-kasing pinaagi sa paghimo natong mga Pinoy nga adik?

Ang mga Tsino nakasulod na sa mga isla nga gipanag-iya sa Pilipinas ug mikontrolar na niini nga wala kitay nahimo maong maingon nato nga sila nagmalampuson.

Sa ilang pagpasulod sa nasud sa Pilipinas sa gidili nga drugas, paagi ba usab nila kini aron makasulod na g’yud sila sa atong mainland ug wagtangon ang sakto nato nga paminsar sa katawhan sa Pilipinas aron sa hingpit ila na g’yud kita nga makontrolar?