Mga Pinoy namilegro sa America

“10,000 Pinoys in US face deportation”– headline. Mao kini ang kahimtang karon sa mga Pilipinhon nga nagpuyo sa America ubos sa pamunoan ni Donald Trump. May kalabotan kini sa mga undocumented immigrant children nga ilegal nga gidala ngadto sa America.

Sa 3.4 million ka Pilipino nga atua karon sa America, mga 310,000 niini undocumented, o mga TNT, ug mga 10,000 niini mga batan-ong immigrants nga nakapuyo sa America ubos sa gitawag nga Deferred Action on Childhood Arrivals (DACA) program ni Obama, nga karon buot papason ni Trump.

Si Foreign Affairs Secretary Alan Peter Cayetano namahayag nga ang kagamhanan sa Pilipinas nigahin og salapi nga itabang sa maapektohan niining mga laraw sa Trump administration. Apan, limited ang maong assistance, busa, “prepare  for the worst,” tambag ni Cayetano.

Ang maong mga young immigrants nagtubo sa America, ang uban kanila, nagtungha pa, wala gani makaila sa nasud nga ilang gigikanan, samtang ang uban nakapabarug na’g kaugalingon nga  negosyo.

Karon, gawas niining 10,000 nga mga batan-ong immigrants, giingon dinhi nga moabot pa’g dul-an 800,000 ka Pinoy nga dugay na nga nagpuyo sa America ang maapektohan sa pagwagtang unya sa DACA program ni Obama.

Matud nila: “We are Americans in heart, mind and soul. We just don’t have the correct documentation that states we’re American,” nga kon unsa man ang ilang mga laraw ug mga damgo karon, kining tanan, matud pa, “is up in the air at the moment.”

Samtang giingon nga unconstitutional ang gihimo ni Obama, miingon usab sila nga “that it would be unconscionable to deport those who benefited from the program.

 “These children grew up believing they are American, and so many of them have lived lives of which America can be proud.”

Luoy no?

* * *

Unsa man ni, nagpasagad lang si Senador Antonio Trillanes? Unsa man tuo’y koneksyon sa LTFRB ug sa Bureau of Customs? Ngano man tuod nga na-mention man ang ngalan ni LTFRB-7 Regional Director Ahmed Cuizon sa nagpadayon karon nga imbestigasyon sa Senado sa P6.4 billion nga shabu smuggling.

Si Trillanes nangutana kang Atty. Mans Carpio, son-in-law ni Presidente Duterte kon nakaila ba siya ni Director Cuizon. Unsa may relevance niini sa drug smuggling nga ila karong giimbestigar? Tubag ni Carpio nga wa siya kaila ni Cuizon.

Magpasagad lang diay ni’g pamunit og inpormasyon si Trillanes, o nagpagamit lang siya sa mga tawo nga gustong pulihan ug gusto nga mopuli ni Cuizon?