Ang balaod ug ang perception

Ang mga tigpanalipod sa tawhanong katungod ug sa kabililhon sa kinabuhi namasangil sa gobiyerno ni Presidente Rodrigo Duterte nga nakalapas kini sa Human Rights. Apan sa bag-o lang nga survey, gihatagan sa katawhan og taas nga grado ang administrasyon ni Duterte dihang gipangutana kabahin sa isyu sa pagtamod sa tawhanong katungod.

Ang pasangil sa mga Human Rights ug Life advocates ilang gibase sa sagunson nga pagpamatay dinhi sa Pilipinas nunot sa hugot nga pagpatuman sa Duterte administration sa kampanya batok sa suliran sa gidili nga drugas. Ang sagunson nga patay ilang gihulagway nga wala g’yud masubay sa balaod. Kalapasan kini sa balaod ug moralidad.

Ang resulta sa survey nga naghatag og taas nga grado sa pagtamod sa tawhanong katungod sa gobiyerno ni Presidente Duterte, gibase usab sa perception, o pagtoo sa mga tawo nga gipangutana sa mipahigayon sa survey. Ang perception ug ang balaod dili pareho mao nga wala magtakdo ang resulta sa survey ug sa baruganan sa mga nagbarug sa balaod ug moralidad mahitungod sa pangutana kalabot sa tawhanong katungod.

Ang gobiyerno nagmugna og balaod nga nagpahamtang og taas nga katuigan sa pagkapriso niadtong mga malambigit sa gidili nga drugas, apan wala kini magsilbi kay misamot man ang problema. Ang suliran milapad kay ang mga nadakpan ug gitaral sa hukmanan hapit tanan nakalingkawas tungod sa daghang rason, ug usa na niini ang kurapsyon. Dugay usab ang proseso sa balaod sa pagkonbikto ug pagsilot sa makahimo og salaod mao nga ang mga tawo gikapoyan na sa pagpinaabot.

Mao kini ang rason ngano nga taas ang grado nga gihatag sa mga tawo sa administrasyong Duterte ug miisip na lang nga misubay kini sa lagda ug wala makalapas sa tawhanong katungod bisan sa daghang gipangpatay nga nalambigit sa gidiling drugas.