EDITORYAL - Nindot apan sayop man gud

Dili malalis nga nindot ang katuyoan ni Pajo Barangay Captain Junard “Ahong” Chan sa iyang pag-spray og pintal, o pagmarka sa panimalay sa mga tawo nga matud pa nalambigit sa gidiling drugas. Apan kining maong pamaagi gideklarar na sa Korte Suprema nga supak sa balaod. Tinuod, posible nga sa pagpintal og pulong “identified drug den area” sa pultahan sa apartment o panimalay, kadtong mga tig-anhaan sa maong dapit aron pagsuyop og shabu, dili na moanha kay mauwaw man nga sila klaro na kaayo nga nailhan.

Apan ang problema niini kay susama na man gud og gihukman ni Kapitan Chan nga ang usa ka tawo nakonbikto na sa paghimo og krimen. Klaro baya kaayo sa atong balaod nga ang usa ka suspetsado kinahanglang isipon nga inosente hangtud nga siya mamatud-an nga sad-an human sa paghusay sa hukmanan. Wala gani tingali makapasaka og kaso si Kapitan Chan batok sa mao nga mga tawo, kon tinuod man nga nalambigit sila sa ilegal nga drugas. Ang tukma unta nga gihimo ni Kapitan Chan, nakig-alayon siya sa kapolisan aron maronda ang mga drug den ug kapasakaan og kaso ang mga gikatahapan.

Ang nindot nga tinguha ni Kapitan Chan nga mao ang pagpaundang sa dautang binuhatan sa mga drug pushers usa ka dalaygon, apan dili man gud mahimo nga sa paghimo niini lapason usab niya ang balaod. Ang gihimo ni Kapitan Chan wala’y kalainan sa kampanya ni kanhi Manila mayor Alfredo Lim kaniadto, diin gitataw sa Korte Suprema nga usa kini ka kalapasan sa balaod.

Kon moinsister si Kapitan Chan sa paghimo og “shame campaign” karon nga nasayod na siya nga kalapasan sa balaod ang iyang gihimo, mahimong maglisod na siya sa pagpanubag kon may mopasaka kaniya og kaso sa hukmanan.