“Just pay your taxes”

Mao kini ang pamahayag ug awhag ni Mayor Tomas Osmeña ngadto sa mga negosyante nga naproblema sa ilang business permit. Buot ipasabot nga bisan kon wala’y business permit gumikan sa mga kakulian, as long as mobayad sila sa tukmang buhis, dili sila gukdon sa City Hall.

Gani, matud ni Osmeña, pinaagi sa bag-ong opisina nga tukoron alang ning maong katuyoan, tulo ka tuig ang ihatag ngadto sa mga negosyante pag-accomplish sa mga kinahanglanon pag-secure sa business permit.

Ug ang role o katungdanan sa Treasurer’s Office mao na lang ang pagkobra sa buhis, diin, mo-issue sila’g Certificate of Tax Payment, ang pag-issue sa business permit ibutang na ubos sa buhatan sa Mayor.

Nindot ni nga kaugmaran paghatag og kasayon sa mga negosyante. Daghan kanato ang nakasinati og kahasol pagkuha og permit, lakip na ko. Dili sayon ang pag-secure og business permit gikan sa City Hall.

Ambot kapila ka magbalikbalik sa City Hall, pila ka lamesa ang imong duolon, pila ka ahensiya ang mo-inspection sa imong establishment, ug uban pa nga mga requirements. Hasol g’yud kaayo.

Ug dako ang atong kalipay nga niining bahina, mi-support ang opposition ning maong mga lakang ni Mayor Tom. Nagpasabot nga dili diay kinahanglan nga magpunay sila’g lalis diha sa Konseho, mahimo ra diay nga magkasabot.

Hinaot nga magpadayon kini nga atmosphere diha sa konseho. Matud ni Konsehal Raymond Alvin Garcia, it will make the city more business-friendly, kay among others, ma-cut ang red tape.

Kining kuskos balungos sa City Hall maoy maka-discourage sa mga negosyante pagbukas og bag-ong negosyo, hangtud nga ang uban, mo-operate na lang without a business permit.

Hinoon, matud ni Konsehal Joey Daluz, alang sa mga bag-ong mo-open og negosyo, kinahanglan g’yud nga molukat og business permit, nga niining tungora, we hope, nga kamenosan o wagtangon na sa City Hall ang red tape.

* * *

Ug duna ta’y laing atangan diha sa City Council, ang epekto niining pag-resign ni Konsehal Hanz Abella nga makamugna kuno og bag-ong majority block diha sa konseho. Si Abella mo-assume pagka-commissioner sa 7th Division sa National Labor Relations Commission (NLRC) ubos sa Department of Labor & Emloyment-Region 7.

So, kon magagikan sa opposition ang ipuli ni Abella, mausab gayud ang kamada sa konseho, maapektohan ang mga committee chairmanship. Ato ning atangan.

Maoy atong panghinaot nga kon unsa may mahitabo, dili na usab unta ma-hostage ang mga molupyo sa dakbayan gumikan sa ilang panaglalis unya panahon sa session.