Justice closer to the people

Kini ang dugokan sa judicial reform program sa Supreme Court nga gipangunayan mismo ni Chief Justice Maria Lourdes Sereno.

Sa labing unang higayon, matud ni Sereno, ang usa ka chief justice mikanaug sa pedestal ug mihukas sa iyang black robe ug niatubang sa mga tawo sa usa ka mall roadshow sa usa ka dakong tindahan sa dakbayan sa Sugbo.

Tinguha sa hudikatora nga mapaduol sila sa mga yano nga tawo, kinsa nagpanuko pa gihapon pagduol, tungod sa pagtuo nga dili maabot ang korte.

Usa sa gipaabot ni Sereno ang hearing nga wala’y putol-putol diin dili na tugotan ang mga hangyo nga makapalangay sa dagan sa kaso.

Kasamtangan, maabtan og unom ka buwan ang kalangan sa kaso kon adunay mosang-at og motion for reconsideration.

Karon, ipatuman nila nga kon mauktaba ang hearing karong adlawa, ipadayon kini pagkaugma, aron dili na matanggong og dugay ang mga tawo nga natanggong sa bilanggoan tungod sa kasong giatubang.

Maayo unta kon matinuod kini tungod kay ang reyalidad karon, abtan usa og “siyam siyam” ang kaso tungod sa kahinay sa sistema sa hustisiya sa nasud.

Labaw sa tanan dinhi sa Sugbo, masulbad na ang kahuot ug kakulang sa mga korte sa higayon nga matukod na ang Integrated Judiciary Complex sa SRP nga adunay gahin nga P1 billion.

Ang pangutana kanus-a man mapabarug? Wala man gud mohatag og timelime ang chief justice kon kanus-a masugdan ang proyekto.

Manghinaot na lang ta nga mahatagan dayon kini og katumanan.