Abusado ug arogante

Hilabihan nga nakapangayo og pasaylo sa taxi driver ngadto sa 88-anyos niyang pasahero nga wala’y kukaluoy niya nga gipakanaug taliwala sa kusog nga ulan kay kuno mahadlok siya nga mabahaan ang bag-ong taxi nga iyang gimaneho.

Ang iyang pagpangayo’g pasaylo sa mao nga taxi driver gihimo niya atol sa pag-atubang nila didto sa Land Transportation Franchising and Regulatory Board (LTFRB-7).

Apan ulahi na ang tanan sanglit gipahamtangan man g’yud siya og multa, apil na ang taxi operator, tungod sa duha ka kalapasan nga iyang nahimo.

Naglakip kini sa refusal to convey ug discourtesy ngadto sa iyang pasahero. Kining hitaboa maoy akong ginuntan nga balita ug mao usab ang akong gi-live report sa Balitang Bisdak.

Apan samtang nagbalita ko, wala nako damha nga nakatilaw pud diay ang akong asawa ug mga anak sa ka arogante sa laing taxi driver nga baga’g nawong. Misakay sila sa Mandaue City padulong sa among balay sa Babag Uno, Lapu-Lapu City, apan wala pa gani sila nakaabot sa destinasyon, gusto na silang pakanaugon sa driver kay niabot na kuno sila sa Babag Uno. Mas suheto pa siya kay sa iyang pasahero.

Gihangyo siya sa akong asawa nga ideretso sa amoa kay gabii naman ug naa pa g’yuy bata. Misugot man tuod, pero nagsige og reklamo. Daplin ra gud sa karsada ang among pinuy-anan, mitatak og P170 ang plete diin gitunolan siya og P200. Karon, dili na sab niya suklian apan gisingil sa akong asawa mao nga nasuko na sab ang driver kay layo kuno.

Ang ingon niini nga klase sa driver angayan nga tangtangan sa lisensya ug dili na pamanehoon og taxi. Matud sa LTFRB nga sa paglingkod sa pasahero sa taxi, maisip na nga usa ka kontrata nga dili mahimong putlon. Dili usab puwede nga balibaran sa driver ang mga sumasakay. Ang mga abusado ug aroganteng driver, wala’y luna sa karsada.