Ang adik sa trabaho

Dili maayo nga mahinganlan kita nga adik kay nagpasabot kini nga gubaon nata og utok. Ang hunahuna dili na kaila o kahibalo sa epekto sa buhaton, ilabi na kadtong gihimo nga dangpanan ang druga nga kunohay makahupay, apan nisamot hinuon hangtud nga nayabag, ug dili lang naguba, nadugta pa ang paminsar.

Unsa man g’yud ning termino nga adik? Obsesyon kini sa hunahuna nga nakapatik sa alimpatakan, tungod sa depresyon, ang ulahing solusyon nga narehistro sa utok, mao na’y mapokus sa hunahuna, nga maoy buhaton. Dili lang kay daghan ang adik ug nagumon sa druga, aduna sa’y uban nga nahimo na nga adik sa nagkalainlaing bisyo sama sa sugal, inom, pagbaton og kulukadidang, ug uban pa.

Duna sa’y klase nga adik sa trabaho, dili kita kaingon nga arang-arang na lang kini kay wa man kaayo maguba ang utok, apan ang paminsar maoy nadaot, gumikan sa naghinubra nga pagpokus sa usa ka buhat, maamong ang lawas nga dili na maatiman. Hangtud nga nawad-a’g bili ang iyang paningkamot.

Sama sa higala ko nga batan-on pa nga magsusulat, nga nag-una pa nako nga nipahulay, kay unsaon, ang propesyon nga pagsulat naalid-an man sa usa ka obsesyon. Grabe kaayo nga tanang gutlo, dili padisturbo kay tua na lang nakatutok sa mga sulatonon, nga kanunay naggukod nga makaabot sa ‘deadlines’ sa mga publikasyon.

Ang labihang paningkamot makaayo, apan ayuhon lang sab nga dili kini makompromiso, nga mosangpot sa kapildehan sa atong lawas. Ang lawas, maoy puhonan nga mopasustiner nga makalahutay nga madaugon sa paningkamot.

Busa panggaon nga maatiman sa kanunay, nga mahatagan sa panginahanglan nga mohimsog ang panglawas. Ampingan ang kabililhon niini, nga labaw pa sa hiyas sa kamahal sa butang nga sama sa bulawan. Aduna pa ba’y molabaw sa kabililhon sa atong lawas?