Dugang kalapasan sa Rico’s lechon

Dihang nagpatawag og press conference si magpapatigayon Enrico Dionson, ang tag-iya sa Rico’s Lechon, iyang gibutyag nga maalkanse siya og mga tunga sa milyon ka pesos kada adlaw tungod sa pagpasirado ni Mayor Tomas Osmeña sa iyang mga negosyo.

Tuod, gisakyan dayon ni Mayor Osmeña ang pangangkon sa tag-iya sa Rico’s Lechon pinaagi sa pag-ingon nga kon mokita ang patigayon ni Rico og dul-an sa P20 milyones sa usa lang ka buwan, wala’y rason nga dili siya maningkamot paglukat og permit. Gipasirad-an ni Mayor Osmeña ang duha ka Rico’s Lechon Restaurant sa Barangay Kasambagan ug sa dalan Escario sa Barangay Kamputhaw, apil ang lutoanan g’yud sa mga lechon sa Barangay Talamban kay wala’y permit.

Nagpalaban si Rico sa hukmanan ug nangilyupo nga tabangan siya nga mabuksan pagbalik ang iyang negosyo. Buyno, tan-aw nako, nakapasamot ra kini sa problema ni Rico kay giutingkay na man hinoon ni Mayor Osmeña ang uban niyang palpak.

Daan na nga giangkon ni Rico sa press conference nga wala sila’y mga permiso gikan sa Environmental Management Bureau (EMB), ug nakita ni Osmeña nga wala makatuman ang Rico’s Lechon sa mga lagda sa environmental laws.

Kini sama sa pagbutang og waste water treatment facility aron ang mga hinugas sa mga baboy nga ilang litsonon, dili direkta nga mapunta sa sapa. Matud sa mayor nga daghan diay nga mga nagpuyo duol sa litsonan ni Rico nga nangreklamo.

Aw, karon natribukar na g’yud. Para kanako, dili sab makiangayon nga samtang nakakuwarta og dako si Rico sa iyang negosyo unya wala siya magbayad sa mga gikinahanglang buhis ug mga permit fees. Unya, aron nga malikay si Mayor Osmeña nga madudahan nga gi-single out niya si Rico tungod kay giitsa-pwera man sa negosyo ang iyang umagad, kinahanglang apilon sab niya ang ubang nagnegosyo og lechon dinhi sa Sugbo.

* * *

Didto ko sa Barangay Pasil ug Suba kagahapon kay nagpalit ko og isda para sa among gamay’ng salu-salo diri sa opisina, isip kabahin sa pagsaulog namo sa ika-23 nga anibersaryo sa Banat News, nakita nako nga gubot pa sa lukot ang mga aseras sa maong mga barangay.

Dunay karsada nga kabahin sa M. dela Concepcion, Pasil nga dili maagian og sakyanan kay dunay sakyanan ug daghang trisikad nga nagparking. Maayo tingali Mayor Tom nga putlan nato sa ilang honorarium sa City Hall ang mga tanod niining mao nga mga barangay.

Wala nila tumana ang imong kamandoan nga hawanan ang ilang aseras.