Kinahanglang modupa
Bisan sa pasalig ni Presidente Rodrigo Duterte nga dili niya duphan ang mga polis sa Caloocan kay nakakita siya sa CCTV footage nga giluba bisan wa mosukol ang Grade 11 nga si Kian Lloyd delos Santos, wa ko magtuo nga masilotan ang abusadong mga polis.
Kining gihimo karon sa presidente mao ang pagsakay, inay pagsungasong, sa higanteng bawod sa pagbangotan ug kasilag sa pagkakalas sa inosenteng kinabuhi.
Nga kon mahimong simbolo sa uban pa nga kaliboan ka biktima sa laktud nga pagpamatay sa iyang gubat sa drugas, takus nga makabanlas sa iyang pamunoan.
* * *
Sa pikas nga bahin, nakabuylo na sab ang makinarya sa propaganda sa kapolisan. Sama sa nangaging mga kaso, abunda ang ilang mga pasangil batok ni Kian: Siya ang tigpayuhot sa suplay sa shabu gikan sa iyang amahan ug uyoan, ug nga badlungon sa ilang kasilinganan.
Gilusad sab ang mas law-ay nga kampanya sa propaganda sa social media: Nga gisakyan ang kaso ni Kian sa mga kaatbang sa administrasyon, nga gawas nga klarong namolitika, mga dumadapig pa g’yud sa drug lords, mga manlulugos, mga tulisan ug ubang bagis nga mga kriminal.
* * *
Epektibo hinuon nga nabaraw ang pakauwaw batok ni Kian ug sa mga nikondenar sa iyang kamatayon:
Si Education Secretary Leonor Briones naneguro nga buotan si Kian kay naapil sa voucher program sa DepEd sa mga tinun-an sa senior high school sa pribadong mga eskuylahan; ug
Si Fr. Ranhilio Aquino, dean sa San Beda Graduate School of Law, nipasabot nga bisan durugista pa si Kian dili gihapon angay’ng lakturon pagluba; ug
Ang mas gamhanang tugon sa katiguwangan mao nga dili angay’ng pakauwawan ang mga minatay nga dili na makapanalipod sa ilang kaugalingon.
* * *
Ang kamaru ni Duterte, motudlo niya nga palabyon una ang unos sa mga protesta sa trahedya ni Kian. Ang kaabunda niya’g ulog-ulog, makahatag og dugang lugway. Ang hulga pagpriso sa mga polis, sayon ra nga bakwion nga komedya ra diay kon molurang na ang sitwasyon.
Ang pait nga kamatuoran mao nga wa’y kapilian si Duterte gawas sa pagdupa sa mga polis, kay kon tugotang mapriso ang mga nakapatay ni Kian, human nipasalig nga iyang pasayluon ang tanan nilang atraso, kinsa pa man ang mangisog pagpatuman sa iyang gubat sa drugas?
* * *
- Latest
