EDITORYAL - Birthday karon sa Banat News
Karong adlawa, maoy ika-23 ka tuig nga sumad sa pagkahimugso sa Banat News, ang labing una nga inadlaw’ng pamantalaang Binisaya dinhi sa Sugbo. Nahukman ni Sir Jose “Dodong” Gullas ang pag-imprinta og Binisaya nga pamantalaan aron nga masabtan gayud pag-ayo ang mga balita ug ubang isyu niadtong dili kaayo makasabot sa pinulongan nga Eningles.
Tuod, ang Banat News gihangop ug gikuninitan sa mga Sugboanon, ug bisan na gani sa ubang lumolupyo sa silingang mga dapit sa Kabisay-an. Gawas nga sayon kaayong sabton ang mga sinulat nga balita, gituyo usab nga barato ra ang kantidad aron nga dili lisud ni bisan kinsa ang pag-angkon og kopya sa pamantalaan.
Bisan og ang mga Gullas naila nga mga politiko dinhi sa Sugbo, apan ang mga editors ug reporters sa iyang pamantalaan mapagarbuhon ug dako kaayo’g pagdayeg kang Sir Dodong Gullas kay dili gayud kini mobadlong kon may mga balita nga maglambigit kanila. Kanunay niya nga gipahinumdoman ang mga editors nga mahimong mawad-an og respito ang publiko ngadto sa Banat News kon dili kini mopatik sa mga isyu nga maglambigit kanila.
Kini maoy hinungdan nga nahukman kaniadto nga ang pamantalaan hinganlan og Banat News, kay nagpasabot kini nga ang mga editors ug reporters niining maong pamantalaan dili gayud magpanuko pagbanat, ni bisan kinsa, kon makahimo og sayop, kay obligasyon sa pamantalaan nga masayod ang publiko sa tinuod nga mga panghitabo.
Bisan gani ang mga maglilindog niining mao nga pamantalaan nga sakop usab sa lainlaing radyo ug telebisyon, wala did-i sa pagbanat ni bisan kinsa nga opisyal sa kagamhanan nga makahimo og sayop sa ilang pangatungdanan.
Niining lain pa nga tuig sa pagpanerbisyo, ang Banat News, mopasalig nga magpabilin kami nga wala’y dapigan, gawas lang sa kamatuoran.
- Latest