Transparency sa BRT?

Sa unang pag-approve sa BRT, dili diay to transparent? Karon, buot nilang ipa-review ug study-han pag-usab, nagpasabot ba nga wa diay to moagi’g feasibility study? Duna diay gitagoan ang BRT? Unsa man? Unsa may buot nilang ipa-transparent?

Ngano nga sa pag-approve niini sa unang panahon, nga wala may problema ang funding, nga sa dayon na untang pag-implement niini, wala may mi-question sa transparency, wala’y mi-question kon makasulbad ba sa trapiko, wala may mi-question pagdugang sa allotment, ug wala may misugyot nga mas feasible ang LRT kay sa BRT?

Karon, dili ba mahimo nga dunganon ang LRT ug BRT?  Puslan man nga daghan kaayo’g kuwarta para “build, build, build” project ang Duterte administration. After all, dugay pa kanang LRT. By the time nga ma-implemented ang LRT, human-human na tingali ang BRT ug ang ubang infrastructure projects dinhi sa atong lalawigan ug mga dakbayan sa Sugbo.

So, nganong ipa-scrap man g’yud ang BRT? Tungod lang kay dunay usa ka engineer nga miingon nga dili kini mosalir dinhi sa Cebu City?

* * *

Daghan ang nangutana nga sa kadaghan na nga nadakpan ug nangamatay, nga either drug user, drug trader, drug protector, o drug lord g’yud, nganong nagpadayon man gihapon kining maong bisyo, ug daghan man gihapon ang nadakpan ug namatay? Ingon ba g’yud niini ka luxurious kining maong negosyo sa druga nga ila man nga isugal ang ilang kinabuhi?

O, ang kahakog, ang greed for money maoy nagtukmod kanila pagsulod ning maong matang sa negosyo nga makaliso sa utok sa mabiktima niini?

Karon, atong nakita unsa kadako ug kagrabe kining maong suliran, nga sa unang mga administrasyon, hadlok silang motandog niini. Mikuyanap na kini sa tibuok nasud, diin daghan ang na-involved nga mga personalidad nga wala kita magdahom nga mahilambigit sila niini.           Si Duterte nagtuo nga sulod lang sa tulo ngadto sa unom ka bulan, iyang masulbad ang drug menace. Wala siya magdahom nga ingon diay niini ka lawom ang maong suliran, maayo na nga pagkagamot sa galamhan sa mga nahilambigit niini, nga gani,  dili na sila mahadlok madakpan ug mamatay.

Sa ubang kanasuran, mga advanced countries, wala gayud nila masulbad sa hingpit ang drug problem. Nga kon wala pa maninuod si Duterte niining kampanya batok sa gidiling druga, mao usab unta ang mahitabo sa atong nasud nga maulipon na unya kita sa mga drug lord ug drug protector.

Layo pa ang kasulbaran niining tanan. Gikinahanglan ang pagsabot ug pagpaluyo sa katawhan.