Wala’y mga permit

Angay g’yud nga suportahan kining kampanya ni Mayor Tomas Osmeña paggukod sa mga magpapatigayon nga wala magbayad og buhis ngadto sa dakbayan sa Sugbo. Sa ato pa, walay business permit.

Basta wala la’y pili ang pagpatuman sa balaod, angay pa gani nga daygon ang mayor tungod kay ang buhis nga makolekta sa siyudad gikan sa mga molukat og business permit, magamit man sa lainlaing proyekto.

Suheto ko nga daghan kaayong mga balay patigayon dinhi sa dakbayan sa Sugbo ang nag-operate bisan og walay business permit. Kon dili gud molukat og business permit nagpasabot nga wala makabayad og buhis ang tag-iya.

Mahimo usab nga naglukat og business permit ang usa ka balay patigayon apan wala kini motug-an sa tukma nga gross income, ug pinaagi sa pakigkunsabo sa mga kiriwan nga City Hall employees, milusot ra ang permit.

Sa ato pa, ang tag-iya sa balay patigayon nakabayad ra og gamay kaayong buhis. Pareho gud sa giingon ni Mayor Osmeña nga ang usa ka bangko diha sa Magallanes, mibayad ra og P2,000 nga buhis sa usa ka tuig, apan ang tag-iya og gamay kaayong tindahan daplin sa aseras nga 6 x 2 meters ra ang gidak-on, ug namaligya og casing sa mga cellphone, mideklarar og P1 million nga income ug mibayad og P10 mil nga buhis. Makiangayon ba?

Bahin sa negosyo ni Sir Rico Dionson, ang Rico’s Lechon, tukma ra ang gihimo ni Mayor Osmeña nga gigukod kini niya kay ganansiya kaayo kining negosyo sa akong higala unya wala siya magbayad og kompleto nga buhis.

Angay’ng paspasan pa ni Mayor Osmeña ang paggukod sa ubang “tax evaders” dinhi sa dakbayan sa Sugbo, ug nga dili siya mahadlok nga kining mga tawhana maghiusa sa pagkontra kaniya sa umaabot nga eleksiyon.

Angay ninyo nga sabton nga kon dili kamo mobayad sa tukmang buhis, unsa man ang gastohon sa siyudad sa pagpatuman og mga proyekto nga para sa katawhan?